Rossiyaning Qozon shahri sudi qarori bilan O‘zbekistonga deportatsiya qilingan 6 nafar farzandli ayolga yordam ko‘rsatildi. Bu haqda Bolalar ombudsmani xabar berdi.
Qayd etilishicha Oliy Majlisning Bola huquqlari bo‘yicha vakili nomiga 9-aprel kuni Tatariston Respublikasi Bolalar ombudsmanining murojaati kelib tushgan. Murojaatda O‘zbekiston fuqarosi N.Q (ayol) 20 yil avval doimiy yashash uchun Qozon shahriga kelgani, yong‘in oqibatida uning fuqarolik pasporti yonib ketgani va Rossiyada hech qanday hujjatlarsiz yashagani, N.Q.da bu vaqt davomida 6 nafar farzandi tug‘ilgani, Qozon shahri tuman sudining qarori bilan u farzandlari bilan shu yilning 5-mart kuni Rossiyadan majburan chiqarib yuborilgani aytilgan.
Shu bilan birga, Tatariston Bolalar ombudsmani hozirda N.Q. 6 nafar farzandi bilan Toshkent shahrida boshpanasiz va pulsiz og‘ir ahvolda ekanini va bu oila ijtimoiy hamda boshqa turdagi yordamga nihoyatda muhtojligini bildirgan.
Bolalar ombudsmani xorijiy so‘rovda bayon etilgan holatni atroflicha o‘rganib, vaziyat yuzasidan zaruriy choralar ko‘rilishi uchun Ijtimoiy himoya milliy agentligiga va IIVga so‘rov yuborgan. Agentlik tomonidan ushbu murakkab holat kompleks ravishda atroflicha o‘rganilib, N.Q. va uning 6 nafar farzandiga qator muammoli masalalarda manzilli ko‘mak ko‘rsatilgan.
Jumladan, aprel oyida ayol va uning farzandlari uchun eng zaruriy birinchi navbatdagi ko‘mak ko‘rsatilib, oziq-ovqat, kiyim-kechak va boshqa maishiy ehtiyojlari taʼminlandi hamda bugungi kunda bu borada ko‘mak davom ettirilmoqda.
“26-aprel kuni oila vaqtincha boshpana uy-joyga joylashtirildi. Shuningdek, IIV tomonidan 24-aprel kuni N.Q.ga va uning voyaga yetgan farzandi I.Q. (2006-yilda tug‘ilgan)ga shaxsini tasdiqlovchi hujjatlar rasmiylashtirib berildi”, — deyiladi xabarda.
N.Q. farzandlari bilan Tataristonga tez kunda qaytish va farzandlari u yerda o‘z taʼlimini davom ettirishi istagida ekanidan kelib chiqib, hozirda uning barcha farzandlariga (2009-yilda tug‘ilgan L.Q., 2011-yilda tug‘ilgan R.Q., 2015-yilda tug‘ilgan I.Q., 2017-yilda tug‘ilgan I.K., 2022-yilda tug‘ilgan A.Q.) xorijga chiqish pasportlari rasmiylashtirish jarayonida.
Ta’kidlanishicha, Bolalar ombudsmani xorijiy hamkasbi bilan N.Q.ning Qozon shahri sudining deportatsiyaga oid qarorining yuqori instansiyada qayta ko‘rilishida N.Q. va uning Rossiyada tug‘ilgan farzandlarining qonuniy manfaatlarini himoyalash yuzasidan huquqiy ko‘mak ko‘rsatilishiga oid muzokaralar olib bormoqda.
Avvalroq 2023-yilda bola huquqlari bo‘yicha vakil nomiga bola huquqlari va qonuniy manfaatlari buzilishi to‘g‘risida fuqarolar, bolalar hamda ularning qonuniy vakillari tomonidan jami 443 ta murojaat qabul qilinib, o‘rganilgani to‘g‘risida xabar berilgandi.
Izoh (0)