Қатар авиакомпанияси июнь ойидан Доҳа—Тошкент йўналишида тўғридан тўғри авиақатновларни йўлга қўяди, деб хабар берди “Дунё” АА.
-6q61nZY2.jpg)
Маълум қилинишича, Ўзбекистон элчиси Ашраф Хўжаев Qatar Airways компанияси бош ижрочи директори Бадр Муҳаммад Ал-Мийр билан учрашди. Унда давлатлараро тўғридан тўғри авиақатновларни йўлга қўйиш, карго ташувларини амалга ошириш, замонавий авиахизматлар соҳасида тажриба алмашиш каби масалалар муҳокама қилинди.
Бадр Муҳаммад Ал-Мийр Ўзбекистон ва Қатар ўртасида дўстона алоқаларни шакллантиришда давлатларни боғлаб турадиган авиақатновларни йўлга қўйиш жуда муҳим эканлигига эътибор қаратди.
“Режаларимиз ва умидларимиз улкан. Дастлаб ҳафтасига тўрт марта, кейинчалик эса кунлик равишда ҳаво қатновларини амалга оширишни режалаштирганмиз”, — деган компания бош ижрочи директори.
Таъкидланишича, тўғридан тўғри авиақатновлар орқали ўзаро туристлар оқими ва икки томонлама савдо ҳажми ҳам ошиб боради.
Учрашув якунида томонлар 2 июнь куни Доҳа—Тошкент—Доҳа авиақатновининг тантанали очилиш маросимини ўтказишга келишиб олди.
Ўзбекистон—Қатар муносабатлари
Сўнгги вақтларда икки давлат ўртасида турли соҳаларда ҳамкорлик ривожланмоқда. 2023 йилнинг октябрида Шавкат Мирзиёев Қатарга ташриф буюриб шайх Тамим бин Ҳамад аль-Таний билан музокаралар ўтказган, унинг якуни бўйича қатор ҳужжатлар, хусусан, туризм ва ишбилармонлик тадбирлари соҳасида битим имзоланганди. Ўзбекистон ва Қатар етакчилари икки томонлама шерикликни сифат жиҳатидан янги даражага олиб чиқишга келишган.
Изоҳ (0)