“AQSH Afrika uchun Rossiya yoki Xitoydan ko‘ra yaxshiroq variant” — AQSH savdo kotibi

Amerika Qo‘shma Shtatlari Afrika davlatlari uchun savdodagi eng yaxshi sherik va u Xitoy hamda Rossiyadan ko‘ra ishonchliroq. Bu haqda 30-aprel kuni CNN nashri AQSH savdo kotibi Jina Raimondo bayonotiga asoslanib, xabar berdi.

Manbada aytilishicha, AQSH Afrika hukumatlariga savdo hamkori tanlashda bosim o‘tkazmaydi. Hamma o‘z hamkorini erkin tanlashi kerak. Ammo AQSH bilan hamkorlik bu qitʼa mamlakatlari uchun har jihatdan kafolatlangan.

“Biz o‘zimizni eng yaxshi tanlov varianti deb hisoblaymiz. Biz Afrikaning erkinlik va demokratiya qadriyatlariga mos keladigan imkoniyatlarni taklif qilamiz. Biz siz bilan ko‘p yillik hamkor bo‘lishni xohlaymiz”, — degan kotib Raimondo CNN nashriga bergan intervyusida.

Jina Raimondo Afrikaga birinchi rasmiy safari chog‘ida Keniya prezidenti Uilyam Ruto bilan uchrashgan. Keniya poytaxtida biznes-forum tashkil etib, uning doirasida nutq so‘zlagan.

Kotib Raimondo, Afrika davlatlari AQSH va Yevropa hukumatlarining demokratiya va inson huquqlari haqidagi “maʼruzalari”ni yoqtirmasligi va jiddiy talablarni qo‘ymaydigan Xitoy yoki Rossiya bilan ishlashni afzal ko‘rishi haqidagi savollarga munosabat bildirgan. Uning fikricha, AQSH mintaqada geosiyosiy maqsad asosida harakat olib bormaydi. Shu boisdan ham u bilan hamkorlik xavfsiz.