“Ukraina urushdagi g‘alabadan keyin NATOga qo‘shiladi” — Zelenskiy

Ukraina prezidenti Vladimir Zelenskiy Ukraina Rossiya bilan urushda g‘alaba qozonganidan keyin NATOga a’zo bo‘lishiga ishonchi komil. Zelenskiy bu haqda alyans bosh kotibi Yens Stoltenberg ishtirokida NATO standartlari bo‘yicha professional harbiy ta’lim kurslari o‘tayotgan ofitserlar bilan qo‘shma uchrashuvda aytib o‘tdi.

“Mening shaxsiy fikrimcha, biz urushda g‘alaba qozonganimizdan keyin NATOga qo‘shilamiz. Urush davom etayotgan paytda bizni NATOga qabul qilishmaydi. Bu tashkilotning boshqa a’zolari uchun katta tahdid bo‘ladi. To‘liq ko‘lamli urushni boshdan kechirayotgan Ukrainaning darajasi hech kimda shubha uyg‘otmasligi kerak. Bizda turli yo‘nalishlar bo‘yicha yuqori darajali mutaxassislar bor”, — deya ta’kidladi Zelenskiy.

Prezident Ukrainaning alyansga qo‘shilishi haqidagi qaror alyansga aʼzo barcha mamlakatlarning yakdil fikrga kelishiga bog‘liqligini qo‘shimcha qildi.

“Ukrainani siyosiy jihatdan NATOga qabul qilish uchun g‘alaba talab etiladi”, — dedi Zelenskiy.