Isroil qo‘shinlari G‘azo sektorining Misr bilan chegarasidagi Rafah shahrida operatsiya o‘tkazadi. Bu haqda Isroil bosh vaziri Binyamin Netanyaxu Falastin anklavida garovga olinganlarning qarindoshlari bilan uchrashuvda ma’lum qildi.
“Urushni barcha maqsadlarga erishmaguncha to‘xtatmaymiz. Biz Rafahga kirib boramiz va u yerda joylashgan HAMAS batalyonlarini yo‘q qilamiz”, — dedi Netanyaxu.
Isroil bosh vazirining taʼkidlashicha, bu ish “Falastin radikallari bilan garovga olinganlarni ozod qilish bo‘yicha kelishuvga erishiladimi yoki yo‘qmi, bundan qat’iy nazar sodir bo‘ladi”. Uning so‘zlariga ko‘ra, Rafahdagi operatsiya HAMAS ustidan “to‘liq g‘alaba qozonish” uchun zarur.
Bayonotda aytilishicha, garovga olingan odamlarning qarindoshlari Isroil hukumati rahbari bilan suhbatda uni “urush maqsadlariga erishishda davom etish va G‘azodagi vaziyat bo‘yicha xalqaro bosimga qarshi turish”ga chaqirgan.
O‘tgan yilning noyabr oyi oxirida Isroil va HAMAS o‘rtasida bir hafta davom etgan vaqtinchalik gumanitar sulh o‘rnatilgandi. 1-dekabr kuni sulh buzildi, jangovar harakatlar qayta boshlandi va hozirgacha davom etmoqda. Isroilning so‘nggi maʼlumotlariga ko‘ra, G‘azo sektorida 133 nafar Isroil fuqarolari garovda qolmoqda.
Izoh (0)