Jouan Rouling qalamiga mansub Garri Potter haqidagi kitoblar to‘plamining yangi audio versiyasi taqdim etiladi. Loyiha taqdimoti 2025-yilning so‘nggi choragida Amazon’ning Audible xizmatida bo‘lib o‘tadi. Mazkur audiokitob ustida Pottermore Publishing ham ish olib bormoqda, deb yozadi “Pravila jizni” nashri.
Audiokitobga ismlari e’lon qilinmagan 100 dan ortiq aktyorlar ovoz beradi. Qayd etilishicha, loyihaning Warner Bros.ga tegishli kinofranshiza bilan hech qanday aloqasi yo‘q.
Amazon Audible va Pottermore Publishing hamkorlikda bo‘lajak loyiha uchun treyler chiqardi. Unda ovoz yozish studiyasi, mikrofonlar, va Garri Potter ko‘zoynaklari tasvirlangan. Videoda Rouling kitoblaridan iqtiboslar keltirilgan:
Ta’kidlanishicha, tinglovchilar “yuqori sifatli ovoz, immersiv saundtrek va ko‘plab qahramonlar tarkibi” tufayli qiziqarli sarguzashtlar dunyosiga sayohat qilish imkoniga ega bo‘ladi.
Garri Potter haqida hikoya qiluvchi kitoblar va filmlar so‘nggi o‘ttiz yil davomida butun dunyoda millionlab muxlislarni jalb eta oldi. Biz Audible foydalanuvchilari uchun sehrli maktab haqida hikoyaning yangi talqinini namoyish etishdan juda xursandmiz. Umid qilamizki, yangi loyiha franshizaning eski va yangi muxlislariga birdek manzur bo‘ladi, — dedi Audible direktori Bob Karrigan.
Yettita audiokitobning har biri ketma-ketlik tartibida, avval “Garri Potter va hikmatlar toshi”dan boshlab chiqariladi.
1999-yilda yozib olingan Garri Potter haqidagi eski audiokitoblar esa Audible’da qoladi. Unga aktyorlardan Stiven Fray va Jim Deyl ovoz bergan. Servisga joylashtirilgan vaqtdan boshlab mazkur audiokitoblar 1,4 milliard soatdan ortiq vaqt davomida tinglangan.
Izoh (0)