“Quyoshli xonadon” dasturi asosida 2024-yilning yanvar—fevral oylarida aholi xonadonlaridan 500 million so‘mlik elektr enegiyasi sotib olindi. Bu haqda “O‘zbekiston 24” telekanali orqali efirga uzatilgan lavhada ma’lum qilindi.
Prezident qaroriga muvofiq, 2023-yil 1-apreldan respublika hududlarida aholi xonadonlariga kichik quvvatli (umumiy quvvati 50 kVt gacha) quyosh panellarini o‘rnatishni rag‘batlantirish bo‘yicha “Quyoshli xonadon” dasturi amalga oshirilmoqda. Dastur doirasida aholi tomonidan quyosh panellari orqali ishlab chiqarilgan ortiqcha elektr energiyasining har bir kilovatt-soatiga 1 000 so‘mdan subsidiya ajratiladi.
Davlat soliq qo‘mitasi tomonidan “Quyoshli xonadon” dasturi asosida 2024-yil yanvar-fevral oylarida aholi xonadonlarida o‘rnatilgan quyosh panellari orqali ishlab chiqarilib, hududiy elektr tarmoqlari korxonasiga uzatilgan (sotilgan) elektr energiyasi uchun 500 million so‘mlik subsidiya to‘lab berilgan. Ya’ni 1498 nafar fuqarodan 500 ming 526 kVt/soat elektr energiyasi sotib olingan.
2024-yil 1-mart holatiga ko‘ra, 13 ming 48 kishi “Quyoshli xonadon”ga ariza topshirgan bo‘lib, 12 mingga yaqin ariza tasdiqlangan. Toshkent shahrining o‘zida bir oyda 6 million so‘mgacha subsidiya mablag‘larini ko‘chirib olish holatlari qayd etilgan.
Izoh (0)