“Қуёшли хонадон” дастури асосида 2024 йилнинг январь—февраль ойларида аҳоли хонадонларидан 500 миллион сўмлик электр энегияси сотиб олинди. Бу ҳақда “Ўзбекистон 24” телеканали орқали эфирга узатилган лавҳада маълум қилинди.
Президент қарорига мувофиқ, 2023 йил 1 апрелдан республика ҳудудларида аҳоли хонадонларига кичик қувватли (умумий қуввати 50 кВт гача) қуёш панелларини ўрнатишни рағбатлантириш бўйича “Қуёшли хонадон” дастури амалга оширилмоқда. Дастур доирасида аҳоли томонидан қуёш панеллари орқали ишлаб чиқарилган ортиқча электр энергиясининг ҳар бир киловатт-соатига 1 000 сўмдан субсидия ажратилади.
Давлат солиқ қўмитаси томонидан “Қуёшли хонадон” дастури асосида 2024 йил январь февраль ойларида аҳоли хонадонларида ўрнатилган қуёш панеллари орқали ишлаб чиқарилиб, ҳудудий электр тармоқлари корхонасига узатилган (сотилган) электр энергияси учун 500 миллион сўмлик субсидия тўлаб берилган. Яъни 1498 нафар фуқародан 500 минг 526 кВт/соат электр энергияси сотиб олинган.
2024 йил 1 март ҳолатига кўра, 13 минг 48 киши “Қуёшли хонадон”га ариза топширган бўлиб, 12 мингга яқин ариза тасдиқланган. Тошкент шаҳрининг ўзида бир ойда 6 миллион сўмгача субсидия маблағларини кўчириб олиш ҳолатлари қайд этилган.
Изоҳ (0)