Ijtimoiy soha obyektlarida “quyosh energiyasi”dan foydalanish uchun alohida kompaniya tashkil etiladi 

Ayni vaqtda prezident Shavkat Mirziyoyev Yangi Andijon tumanida viloyat faollari va masʼullar ishtirokida videoselektor yigʻilishini oʻtkazmoqda. Bu haqda “Daryo” muxbiri xabar berdi. 

Prezident ijtimoiy soha obyektlarida “quyosh energiyasi”dan foydalanish uchun alohida kompaniya tashkil etilishini aytdi. Unga 200 million dollar mablagʻ beriladi.

“6 ta yirik bank ustav fondiga 50 million dollar va aylanma mablagʻiga 150 million dollar ajratadi. Kompaniya quyosh panellari va suv isitish qurilmalarini oʻzi oʻrnatadi va “yashil energiya”ni byudjet korxonasiga sotadi.  Shuningdek, bu soha daromadliligini tadbirkorlarga tushuntirib, ularni jalb qilish kerak. Kichik quyosh panelidan olinadigan 1 kilovatt-soat elektr energiya tannarxi oʻrtacha 450 soʻm, byudjet tashkilotiga 800 soʻmga sotish mumkin”, — dedi davlat rahbari.

Shavkat Mirziyoyev yirik korxonalarda ham qayta tiklanuvchi energiya manbalari oʻrnatilishini aytdi. 

“Andijonlik tadbirkorlar har doim eng ilgʻor tashabbuslar bilan chiqib, boshqa hududlarga oʻrnak boʻladi. Bu safar ham, koʻplab yirik tadbirkorlar, mahallalar oʻz binolarida quyosh energiyasini oʻrnatishni boshlagani, katta-katta marralar olayotganidan xabarim bor. Biz bunday fidoyilarni albatta qoʻllab-quvvatlaymiz”, — dedi prezident.

Davlat rahbari vodiydagi yirik korxonalar oʻzining elektr ehtiyojini 100 foiz oʻzi taʼminlashga oʻtkazish, viloyat hokimlari, Energetika vazirligi va tarmoq rahbarlari uchun ustuvor vazifa boʻlishi kerakligini taʼkidladi.

Prezidentning aytishicha, Savdo-sanoat palatasi barcha yirik va oʻrta korxonalar bilan birga ishlab, ularga manfaatli sharoit yaratib, Andijon tajribasini respublikada ommalashtirishga masʼul boʻladi.

“Shu bilan birga, vodiy tadbirkorlari 20, 30 va 50 Megavattli kichik quyosh stansiyalari va mini-GESlarni qurish boʻyicha takliflar bilan chiqmoqdalar. Bu menga maʼqul. Bu borada ularga barcha sharoitlarni yaratib beramiz”, — deya qoʻshimcha qildi davlat rahbari. 

Prezident Investitsiyalar, sanoat va savdo vazirligi sanoat korxonalarida quyosh panellari oʻrnatish va kichik stansiyalar qurish uchun xalqaro moliya tashkilotlaridan 2 milliard dollar jalb qilishini aytdi.

“Endilikda, aholiga quyosh energiyasidan foydalanish uchun jozibador tizim yaratamiz. Vodiydan boshlab, xonadonlarda ishlab chiqarilgan va tarmoqqa uzatilgan har bir kilovatt soat uchun 1 ming soʻmdan hisob-kitob qilinadi (hozir 295 soʻm)”, — dedi prezident.