Toshkent viloyati hokimi Zoir Mirzayev bugungi kunda maktablarda otalar majlisi judayam kamayib ketayotganini, biroq, otalar majlisi bugungi kun uchun ahamiyatli ekanini aytdi. Bu haqda u Angren shahridagi 17-maktabdagi otalar majlisida gapirdi.
Ona o‘n marta bolasini tergab, nima qilyapsan deb so‘raganidan ko‘ra, otaning bir marta bolam nima qilyapsan deb so‘rashi bosib ketadi. Biz shuning uchun bugun otalar majlisini chaqirdik, — deydi Toshkent viloyati hokimi Zoir Mirzayev.
Viloyat rahbari otalar majlisi haqida gapirar ekan, bir bolaga yetti mahalla ota-ona degan gapni, milliy qadriyatlarni bola ruhiyatiga singdirish lozimligini aytdi.
Bolaning miyasida bo‘shliq paydo bo‘lsa, u maktabda yaxshi o‘qimagan, fanni yaxshi o‘zlashtirmagan bo‘lsa, diniy yo‘l bilanmi yoki dunyoviy yo‘l bilanmi yot g‘oyalar singdiriladi. Bo‘shliq bor joyga yot g‘oya singadi. Menga hozir Milliy gvardiya formasini kiygan bir sinfning yigit-qizlarini ko‘rsatishdi. Bolalar ko‘zi yonib turibdi. Ularning har birida g‘urur bor. Forma kiyganidan g‘ururlanyapti. Vatanga kerakli odam bo‘lganini, Vatan himoyachisi ekanini anglayapti. Men boshqalarga namuna bo‘lishim kerak deyapti, — deydi hokim.
Zoir Mirzayevning aytishicha, bolasi yo‘q bo‘lib qolganda ota-ona uning qayerdaligini yaxshi bilsa, u baxtli ota-ona hisoblanadi.
Bolangiz yo‘q bo‘lib qolganda, uni topoladigan joyingiz aniq bo‘lsa, bolam kitob o‘qiyapti, sport bilan shug‘ullanyapti, tennis o‘ynayapti deb, uning qayerdaligini bilsangiz, baxtli odamsiz. Lekin bolangizning qayerga ketishi qiziq bo‘lmasa, imkon qadar ketsin, uyda o‘tirsa kiyim so‘raydi, telefonga pul so‘raydi, sigaretga, nosga pul so‘raydi desangiz u chiqib ketadi. Ko‘chadagi bekorchilarga qo‘shiladi. Zahri qotilni sotuvchilarga xaridor kerak. Xaridor kim aynan o‘sha bola, — deydi hokim.
Viloyat hokimi maktab o‘qituvchilari haqida gapirar ekan, ilgari o‘qituvchilarga nisbatan hurmat boshqacha bo‘lganini esga oldi.
O‘qituvchi to‘yga kelsa, to‘yxonada birorta bola bo‘lmasdi. Gilamning orqasida o‘tirar edik. To‘yxona egasining ham bolalari davrada ko‘rinmas edi. Hozirchi, hozir o‘qituvchi va o‘quvchi birga o‘tiribmiz-ku. Kim qildi shuni? O‘zimiz qildik-da. To‘xta, ustozingni hurmat qil demadik. O‘zimiz muallimning obro‘sini tushirdik. O‘ldirsa ham mualliming o‘ldirsin degan tushuncha bo‘lishi kerak. Va bolaga o‘sha muallimning aytganini qilasan deb, maktabga yuborish kerak, — dedi u.
Viloyat hokimi taklifiga ko‘ra, Angrendagi 17-maktabda har oyda bir marta otalar majlisi chaqiriladigan bo‘ldi.
Avvalroq aynan shu maktab, “Telefonsiz maktab” tashabbusida g‘olib bo‘lgani uchun, ularga 300 million so‘m miqdorida mukofot puli berilgani xabar qilingandi.
Izoh (0)