Misr rasmiylari o‘tgan yilning oktyabr oyida Isroil va Falastinning HAMAS harakati o‘rtasida qurolli mojaro boshlanganidan beri G‘azo sektoridan 80 mingdan ortiq qochqinni qabul qilgan. Bu haqda Falastinning Qohiradagi elchisi Diab al-Luh bayonot berdi.
“Misr o‘tgan yilning oktyabr oyidan beri G‘azodan qochgan 80 mingdan 100 minggacha falastinlikni qabul qildi”, — deya uning so‘zlaridan iqtibos keltirgan Al Hadath telekanali.
Bundan uch hafta oldin, 4-aprel kuni “Al-Qohira al-Ixbariya” telekanali manbalarga tayanib, Isroil va HAMAS o‘rtasidagi mojaro avj olgandan beri misrlik shifokorlar 3706 nafar yarador falastinlikni davolagani haqida xabar bergan edi. Qurbonlarni qabul qilishdan tashqari, Misr Falastinga doimiy yordam ko‘rsatmoqda. Manbalarga ko‘ra, G‘azoga kirib kelayotgan insonparvarlik yuklarining 87 foizi Misr hukumati va turli jamoat tashkilotlari tomonidan to‘plangan va jo‘natilgan.
27-fevraldan beri Misr harbiy-havo kuchlari Iordaniya, Qatar, Birlashgan Arab Amirliklari, AQSH va Fransiya bilan birgalikda G‘azoga har kuni insonparvarlik yordamlarini yuborib kelmoqda. Bundan tashqari, G‘azo sektoriga Misrdan Rafah nazorat punkti orqali muntazam yordam yetkaziladi. Qohira Isroil va HAMAS o‘rtasidagi qurolli mojaro boshlanganidan beri bir kun ham o‘tish joyini yopmaganini bir necha bor ta‘kidlagan.
Izoh (0)