AQSH prezidenti Jo Bayden Misr prezidenti Abdulfattoh as-Sisi va Qatar amiri shayx Tamim bin Hamad Ol Soniyga maktub yo‘llab, guruh garovga olingan isroilliklarni ozod qilish bo‘yicha kelishuvga rozi bo‘lishi uchun HAMASga bosim o‘tkazishni so‘radi. Bu haqda Axios agentligi xabar qildi.
“AQSH prezidenti ularni HAMASning kelishuvga rozi bo‘lish va unga rioya qilish majburiyatini olishga chaqirdi”, — deyiladi agentlik xabarida.
Ma’lum qilinishicha, Markaziy razvedka boshqarmasi direktori Bill Berns shu hafta oxirida Isroilning “Mossad” razvedka xizmati rahbari Devid Barnea hamda Qatar va Misrning yuqori martabali rasmiylari bilan G‘azoda HAMAS tomonidan garovga olinganlarni ozod qilish bo‘yicha kelishuvni muhokama qilish uchun Qohiraga boradi.
Portalning qayd etishicha, payshanba kuni Isroil bosh vaziri Benyamin Netanyaxu bilan telefon suhbati chog‘ida Bayden Qohirada bo‘lajak muzokaralar raundi mavzusini ko‘targan va Isroil rahbaridan kelishuv tuzish uchun avvalgidan ham kattaroq vakolatlarga ega bo‘lgan muzokarachilarni yuborishni so‘ragan.
“U Netanyaxuga garovga olinganlarni, shu jumladan, hozirda deyarli olti oydan beri HAMAS tomonidan ushlab turilgan Amerika fuqarolarini ozod qilish uchun hamma narsani qilish kerakligini tushuntirdi”, — dedi Axios manbasi.
Hozirda muzokaralar olib borilayotgan kelishuv G‘azoda olti haftalik o‘t ochishni to‘xtatishni va garovga olingan 40 nafar ayolni, jumladan, harbiy xizmatchilarni, 50 yoshdan oshgan erkaklarni va og‘ir ahvoldagi erkaklarni ozod qilishni talab qiladi.
Buning evaziga Isroil 700 ga yaqin falastinlik mahbuslarni, jumladan, isroilliklarni o‘ldirgani uchun umrbod qamoq jazosini o‘tayotgan 100 ga yaqin kishini ozod qilishi kerak, deb yozadi agentlik.
Izoh (0)