Ukraina prezidenti Vladimir Zelenskiy AQSH Kongressiga Kiyevga yangi yordam paketi haqidagi qarori uchun minnatdorchilik bildirib, mazkur yordam Kreml uchun Ukraina ikkinchi Afg‘onistonga aylanmasligi haqida signal ekanligini ta’kidladi.
Qo‘shma Shtatlar Ukrainani qo‘llab-quvvatlaydi, uning fuqarolari va butun dunyoda demokratiyani himoya qiladi. Biz iloji boricha tezroq frontdagi askarlar uchun zarur yordamni olishni istaymiz, — dedi u.
Zelenskiyga ko‘ra, AQSH yangi yordam paketini maʼqullaganidan so‘ng Ukraina jang maydonidagi vaziyatni barqarorlashtirish va tashabbusni qo‘lga olish imkoniyatiga ega bo‘ladi, chunki Ukraina armiyasi yangi qurollarga muhtoj.
Menimcha, bu yordam qurolli kuchlarni chindan ham kuchaytiradi, agar biz haqiqatan ham juda zarur bo‘lgan qurol tizimini olsak, g‘alaba qozonish imkoniyatiga ega bo‘lamiz, — qo‘shimcha qildi Ukraina rahbari.
Bir kun avval respublikachilar va AQSH Kongressining Vakillar palatasi bir necha oylik qarama-qarshiliklardan so‘ng Ukrainaga qariyb 61 milliard dollar miqdoridagi keng ko‘lamli yordam paketini ma’qulladi. Qonun loyihasini 311 kongressmen ma’qullagan, 112 kishi qarshi ovoz bergan.
Quyi palata ma’qullaganidan keyin qonun loyihasi Senat tomonidan qabul qilinishi kerak. Ovoz berish 23-aprelga belgilangan. AQSH prezidenti Jo Bayden bu hujjatni darhol imzolashini aytgan.
AQSH qonun chiqaruvchi organida demokratlar va respublikachilar o‘rtasidagi Ukrainaga keyingi yordam masalasidagi ziddiyat 2023-yil oxiridan beri davom etmoqda.
Izoh (0)