Америка ва Филиппин кучлари 22 апрель куни Жанубий Хитой денгизида ўзларининг сўнгги йиллардаги энг йирик жанговар машғулотларини бошлади. Бу ҳақда УС Неwс нашри хабар берди.
Манбада айтилишича, машғулотлар 10 майга қадар давом этади. Уларда АҚШ ва Филиппиннинг 16000 дан ортиқ ҳарбий хизматчилари ҳамда 250 нафар атрофида француз ва австралиялик ҳарбийлар ва техникалар иштирок этади.
Филиппин ҳарбийлари машғулотларни “Баликатан” (тагалог тилида елкама-елка) деб номлаган. Ҳарбий машғулотнинг асосий можаро сценарийси Хитой ва Филиппин қирғоқларини ювиб турувчи баҳсли Жанубий Хитой денгизида содир бўлади.
Филиппин ҳарбийларининг айтишича, бу йилги машғулотларнинг асосий йўналиши ҳудудий мудофаадир. Мамлакат ўз қонуний ҳудудларида мудофаа машқлари олиб боради.
Хитой ва Филиппин ўртасидаги келишмовчиликлар кучайиб борар экан, Президент Жо Байден ва унинг маъмурияти агарда Филиппинга ҳужум қилинса, Америка Қўшма Штатлари Осиёдаги иттифоқчиларидан бири бўлган Филиппинни ҳимоя қилишга мажбур бўлиши ҳақида бир неча бор огоҳлантирган.
Хитой Ташқи ишлар вазирлиги матбуот котиби Лин Жиан ҳарбий машғулотлар ҳамда иттифоқчилар ҳарбий техникаси Хитой ҳудудига яқин келганидан хавотирда эканлигини билдирган.
“АҚШнинг бу ҳаракати минтақадаги кескинликни кучайтиради ва нотўғри қарор қабул қилиш хавфини оширади. Филиппин ўзининг хавфсизлик борасидаги манфаатлари учун АҚШ қўғирчоғи бўлаётганини яна бир бор ўйлаб кўриши ва нотўғри йўлдан юришни бас қилиши керак”, — деган Хитой вакили.
Изоҳ (0)