Rossiya Markaziy Osiyo mamlakatlari uchun asosiy savdo sherigi sifatidagi mavqeini saqlab qolishda davom etmoqda. Bu haqda Rossiya sanoat va savdo vaziri Denis Manturov Toshkentdagi “Innoprom. Markaziy Osiyo” ko‘rgazmasida ma’lum qildi, deya xabar bermoqda “Daryo” muxbiri.
“O‘zaro savdomiz barqaror, ijobiy dinamikani qayd etmoqda. Rossiya iqtisodiyotning bazaviy tarmoqlari uchun mahsulotlarni asosiy yetkazib beruvchi sifatida faoliyat yuritib, mintaqa davlatlarining asosiy savdo sherigi sifatidagi mavqeini saqlab kelmoqda”, — dedi Manturov forumning yalpi majlisida.
Uning so‘zlariga ko‘ra, so‘nggi bir yilda Markaziy Osiyo davlatlaridan Rossiya bozoriga import deyarli 12 foizga oshgan, bu birinchi navbatda “Rossiyada sanoat ishlab chiqarishining yaxshi surʼatlari fonida talabning ortishi” bilan bog‘liq.
“Sanksiyalar joriy etilishi, ayrim G‘arb yetkazib beruvchilarining ketishi, shuningdek, do‘stona bo‘lmagan davlatlar bilan savdoning qisqarishi eng yaqin hamkorlarimiz uchun yangi imkoniyatlar ochadi”, — deb hisoblaydi Manturov.
U o‘zaro tovar ayirboshlashning o‘sishiga transport-logistika infratuzilmasini rivojlantirish, Markaziy Osiyoda qo‘shma loyihalarni amalga oshirish va milliy valyutadagi to‘lovlar ulushining ko‘payishi ham yordam berayotganini aytdi.
Izoh (0)