“Isroil hududiga berilgan zarbalar Yaqin Sharqdagi kuchlar muvozanatini o‘zgartirdi” — Eron tashqi ishlar vaziri

14-aprelga o‘tar kechasi Isroil hududiga uyushtirilgan dronlar va raketalar hujumi Yaqin Sharq mintaqasida “kuchlar muvozanatini o‘zgartirgan”.

Bu haqda Eron tashqi ishlar vaziri Husayn Amir Abdullohiyan ma’lum qildi.

“Shubhasiz, tan olingan o‘zini o‘zi mudofaa tamoyili asosida, shuningdek, eʼtirof etilgan xalqaro qonunlar va meʼyorlarga muvofiq amalga oshirilgan ushbu qimmatli va murakkab harbiy harakat Yaqin Sharq mintaqasida kuchlar muvozanati yangicha taqsimlanishiga turtki berdi”, — dedi Abdullohiyan.

14-aprelga o‘tar kechasi Eron Isroildagi nishonlarga dronlar va raketalar bilan hujum qildi, hujumlar to‘lqini taxminan besh soat davom etdi.

Isroil tomoni mudofaa kuchlari Eronning 300 ga yaqin snaryadlarining 99 foizini tutib olganini qayd etdi. Raketa va dronlarning aksariyati Erondan, oz qismi esa Iroq va Yamandan uchirilgan.