Isroil mudofaa kuchlari Eron hujumiga qanday javob berish borasida bir qarorga keldi. Bu haqda manbalarga tayanib, The Jerusalem Post xabar berdi.
Ma’lum qilinishicha, ayni damda Isroil harbiylari javob zarbasi sanasini aniqlagani yo‘q, chunki bu muayyan tayyorgarlikni talab qiladi. Isroil mintaqada keskinlashuvning oldini olish uchun javob zarbasining salbiy oqibatlarini “minimallashtirishga intilmoqda”.
“O‘z navbatida, javob hujumi haqidagi qaror unga tayyorgarlik ko‘rish bosqichida o‘zgarishi mumkin”, — deydi anonim manbalar.
Isroil qanday zarba berishiga aniqlik kiritilmagan.
“Yadroviy inshootlar nishonga olinishi yoki dronlar va ballistik raketalar bilan hujum qilinishi mumkin. Eron Islom inqilobi qo‘riqchilari korpusiga qarshi sanksiyalar yoki kiberhujum varianti ham ko‘rib chiqilmoqda”, — deb yozadi The Jerusalem Post.
Eronning Isroilga hujumi va sabab
Eronning Isroilga hujumiga 1-aprel kuni Isroilning Damashqdagi Eron konsulligiga bergan aviazarbasi sabab bo‘ldi. Diplomatik kvartalga uyushtirgan hujum oqibatida eronlik generallar Muhammad Rizo Zohidiy va Muhammad Hodi hoja Rahimiy, shuningdek, Islom inqilobi qo‘riqchilari korpusining besh nafar zobiti halok bo‘ldi.
Isroil hujumini O‘zbekiston tashqi ishlar vazirligi ham qoraladi. Eron konsulligiga uyushtirilgan hujumga javoban 14-aprelga o‘tar kechasi Isroil hududiga 300 dan ortiq dron, qanotli va ballistik va raketalar uchirdi. Isroil armiyasi ularning 99 foizi urib tushirilgani, bunga 3,5 million dollar sarflanganini da’vo qildi.
Erondan uchirilgan dron va raketalarni urib tushirishga AQSH ham yordam berdi. Hujumdan keyin Jo Bayden Isroil bosh vaziri Binyamin Netanyaxu bilan suhbatda uni Eronga javob zarbasi berishdan tiyilishga chaqirdi. Tehron Isroildan hujum bo‘lgan taqdirda kuchli qurollarini ishga solishidan ogohlantirdi. Isroil armiyasi Eronga, albatta, kerakli vaqt va paytda javob qaytarilishi, bundan boshqa chora yo‘qligini e’lon qildi. AQSH mudofaa vaziri Lloyd Ostin isroillik hamkasbi Yoav Gallant bilan suhbatda vaziyatni keskinlashtirmaslikka chaqirdi.
Izoh (0)