Isroil mudofaa kuchlari 18-aprel kuni G‘azo sektoridagi Nuseyrat qochqinlar lageridan askarlarini olib chiqib ketdi. Bu haqda CNN nashri xabar berdi.
Manbada aytilishicha, Yaqin Sharq nashrlari Isroil askarlari chiqib ketgandan so‘ng vayron bo‘lgan qochqinlar lageri tasvirlarini eʼlon qilgan. Hududda bir necha kun davom etgan shiddatli harbiy amaliyotlar oqibatida bino va inshootlar to‘la vayron bo‘lgani xabar qilingan.
G‘azo fuqarolik mudofaasi boshqarmasi hududdagi talafotlar haqida batafsil maʼlumot eʼlon qilgan. Lager vayronalari ostidan jasadlar olib chiqilayotgani aytilgan. Vayronkorlik ko‘lami yirik bo‘lgani bois jasadlarni olib chiqishda og‘ir texnikalardan foydalanilayotgani maʼlum qilingan.
Manbaga ko‘ra, lagerdagi harbiy amaliyotda 500 nafarga yaqin odam halok bo‘lgan. Yaralangan, hibsga olingan yoki bedarak yo‘qolganlar soni nomaʼlum. CNN bu bilan bog‘liq raqamlarni tasdiqlay olmagan va Nuseyratdagi operatsiyalar ko‘lami va maqsadi haqida maʼlumot olish uchun Isroil harbiylari bilan bog‘langan. Harbiylar maʼlumot taqdim etmagan.
Nashrlar qariyb 25 ming kvadrat metr yo‘llar, suv quduqlari va suvni pompalash generatorlari vayron bo‘lganini yozgan. Yonilg‘i yo‘qligi va shahar servis mashinalarining yo‘q bo‘lib ketishi oqibatida ko‘chalar va lager atrofida 20 ming tonnaga yaqin chiqindilar to‘planib, zararkunandalar bilan bog‘liq muammo yuzaga kelgan.
Izoh (0)