Xitoy va Indoneziya hukumatlari Falastin davlatining BMTga aʼzoligini qo‘llab-quvvatlashini maʼlum qildi. Bu haqda Anadolu nashri batafsil maʼlumot berdi.
Manbada aytilishicha, Xitoy tashqi ishlar vaziri AQSH rasmiylarini o‘z manfaatlarini chetga surib, xalqaro hamjamiyatning gaplarini diqqat bilan tinglashga chaqirgan. Falastin mojarosini hal qilishda vijdonan ish tutishga chaqirgan.
Shuningdek, 18-aprel Xitoy va Indoneziya rasmiylari BMT Xavfsizlik kengashidagi ovoz berishdan oldin Falastinni BMTga aʼzo bo‘lishini qo‘llab-quvvatlashlarini bir ovozdan eʼlon qilishgan. Ikki mamlakatning bu boradagi tutgan yo‘li bir xil ekanligi maʼlum qilingan.
“Xitoy ham, Indoneziya ham Falastinning BMTga to‘laqonli aʼzo bo‘lishini to‘liq qo‘llab-quvvatlaydi”, — deya bayonot bergan Indoneziya tashqi ishlar vaziri Retno Marsudi Jakartada xitoylik hamkasbi Van I bilan bo‘lgan uchrashuvdan so‘ng jurnalistlarga bergan intervyusida.
Xitoy tashqi ishlar vaziri Van I AQSH hukumatini Yaqin Sharq mojarosini hal etish uchun yetarlicha bilimga ega emaslikda ayblagan. Muammoni hal eta oladigan yangi vositachi kerakligini bildirgan.
“Men Amerika hukumati amaldorlari asosiy bilimlarni o‘rganishi kerak, deb o‘ylayman”, — degan Xitoy rasmiysi Van I.
Mart oyi oxirida AQSH BMT Xavfsizlik kengashiga G‘azoda o‘t ochishni to‘xtatishga chaqiruvchi 2728-sonli rezolyutsiyani qabul qilishga ruxsat berib, o‘zi ovoz berishda betaraf qolgan edi. Biroq rezolyutsiya Isroilni anklavdagi shifoxonalar va boshqa fuqarolik tuzilmalarini tinimsiz bombardimon qilishdan to‘xtata olmadi.
“AQSH rezolyutsiyani ‘majburiy emas’ deb atadi va dunyo AQSHning gaplaridan hayratda qoldi. Bu shuni ko‘rsatadiki, AQSH uchun xalqaro huquq faqat ular xohlagancha foydalanadigan vositadir. Birlashgan Millatlar Tashkiloti nizomida Xavfsizlik kengashi rezolyutsiyalari BMTning barcha aʼzolari uchun majburiy ekanligi taʼkidlangan”, — deyiladi Xitoy bayonotida bu holatga munosabat bildirilib.
BMT Xavfsizlik kengashi 18-aprel kuni Falastinning BMTga to‘laqonli aʼzo bo‘lishi uchun rezolyutsiya loyihasini ovozga qo‘yishi eʼlon qilingan edi. Rezolyutsiyani qabul qilish uchun 9 ta ovoz talab qilinadi. Shuningdek, hujjat qabul qilinishi uchun Kengashning besh doimiy aʼzolari – AQSH, Buyuk Britaniya, Fransiya, Rossiya va Xitoydan hech biri unga qarshi ovoz bermasligi kerak.
Falastin kengash tavsiyasiga ega bo‘lgach, BMTga to‘laqonli aʼzo bo‘lishi uchun tashkilot Bosh assambleyasi 193 aʼzosining uchdan ikki qismi ovozini to‘plashi kerak.
Izoh (0)