Кениянинг айрим қисмларида кучли ёмғирлар камида 13 кишининг ҳаётига зомин бўлди ва 15,000 га яқин киши уйини тарк этди. Бу ҳақда Бирлашган Миллатлар Ташкилоти ахборотига таяниб, Associated Press хабар берди.
БМТнинг гуманитар масалаларни мувофиқлаштириш бошқармас 11 апрель куни 20 мингга яқин одам жабрланганини айтган. Март ойининг ўрталарида муссон мавсуми бошланганидан бери бутун мамлакат бўйлаб кучли ёмғир ва тошқинлар сабаб 15 мингга яқин одам ўз уйини ташлаб кетган.
Кения Қизил Хоч жамиятининг маълум қилишича, сув тошқини бешта асосий йўлни, жумладан, Кения шимолидаги Гарисса йўлини ёпиб қўйган. Аҳоли баландроқ жойларга кўчиришга чақирилган.
Ҳозиргача мамлакатнинг 47 округидан тўққизтасида сув тошқини ҳақида хабар берилган. Марказий ҳудудларда кўчкилар қайд этилган. 9 апрель куни мамлакат ғарбий қисмидаги Нарок туманида сув тошқини сабабли тўрт киши ҳалок бўлгани айтилган эди.
Кения Қизил Хоч жамияти бош котиби Аҳмад Идрисга кўра, кўчирилган одамлар ва лагерларда яшовчи одамларга сув орқали юқадиган касалликларнинг олдини олиш учун бошпана ва тоза ичимлик сувини ўз ичига олган ёрдам таклиф қилинган.
Метеорология департаменти маълумотларига кўра, ёмғирли мавсум апрель ойининг охирида энг юқори чўққисига чиқиши ва июнь ойида пасайиши кутилмоқда.
Изоҳ (0)