IIV Yo‘l harakati xavfsizligi xizmati So‘qoq yoki Qiziltog‘ kabi manzillarga hordiq chiqarish maqsadida boruvchi fuqarolarga murojaat bilan chiqdi.
Qayd etilishicha, dam olish kunlarida tirbandliklarning oldini olish hamda harakatni to‘g‘ri tashkil etish maqsadida transport vositalarining harakatlanish yo‘nalishi vaqtincha o‘zgargan.
Xususan, So‘qoqqa borish maqsadida Toshkent shahridan yo‘lga chiqilganda transport vositasi Yangi O‘zbekiston yo‘li bo‘ylab harakatlanib, 4R12 avtomobil yo‘li orqali Yangibozor—Parkent—Qiziltog‘ yo‘liga buriladi. Mazkur yo‘l bo‘ylab So‘qoq yoki Qiziltog‘ kabi dam olish joylariga borishda transport vositalarining harakatlanishi uchun hech qanday cheklovlar yo‘q.
Faqat So‘qoq, Sanganak, Nevich va Novdanak kabi manzillarda hordiq chiqarib bo‘lgach ortga qaytishda Parkent—Yangibozor yo‘li orqali emas, balki Qiziltog‘—Jumabozor—Bardanko‘l orqali 4R12 avtomobil yo‘liga chiqib olishlari mumkin.
Eslatib o‘tamiz, xavfsizlik choralarini ko‘rish maqsadida 9-aprel soat 17:00 dan 10-aprel soat 17:00 gacha Toshkent shahriga yuk avtomashinalari kirishi va shaharda yuk avtomashinalari harakatlanishi to‘liq cheklangan.
Izoh (0)