Пентагон Украина армиясига Starlink алоқа терминалларини етказиб бергани учун Илон Маскнинг SpaceX компаниясига 23 миллион доллар тўлади, деб хабар бермоқда Bloomberg номи ошкор этилмаган америкалик мулозимга таяниб.
Агентлик суҳбатдоши шартномани “АҚШ Украинага кўрсатаётган хавфсизлик ёрдамининг муҳим қисми” деб атади. Starlink терминалларини етказиб бериш бўйича шартнома 2023 йилнинг июнидан 2024 йилнинг майигача амал қилади. Шартнома узайтириладими ёки йўқми, ҳозирча номаълум.
Bloomberg таъкидлашича, бу 23 миллион доллар “Маскнинг космик тадқиқот корпорацияси АҚШнинг баъзи сунъий йўлдошларини учиришда асосий ҳамкор сифатида олган юзлаб миллион долларлар билан солиштирганда арзимас маблағ”.
Россия қўшинлари Украинага киргандан сўнг, SpaceX Украинага камида 24 минг Starlink станцияларини тақдим этди. 2022 йил декабрида Киев яна 10 мингта шундай қурилма олишини эълон қилди. 2023 йил февралида SpaceX Украина ҳарбийларининг дронларни бошқариш учун Starlink сунъий йўлдош алоқаларига киришини чеклади.
Ўша йилнинг сентябрь ойида CNN телеканали Илон Маск ходимларига 2022 йилда Украина ҳарбийларининг Россия ҳарбий денгиз флотига қарши ҳужумларини бартараф этиш учун Starlink сунъий йўлдошларини Қрим қирғоқлари яқинида ёпиш ҳақида яширин кўрсатма бергани ҳақида хабар берган эди.
2024 йил февраль ойида Defence Оnе журнали Украина манбаларига таяниб, Россия қўшинлари Starlink алоқа хизматларидан бир неча ой давомида фойдаланаётгани ҳақида хабар берган эди. Илон Маск SpaceX Россияга Starlink терминалларини бевосита ёки билвосита сотмаганини таъкидлади. Кремль, шунингдек, бу терминаллардан Россияда фойдаланилмаётганини таъкидлади.
Изоҳ (0)