Rossiyalik rejissyor Vitaliy Manskiy Toshkentda o‘tayotgan hujjatli filmlar festivalida Ukrainadagi urush haqida suratga olingan film namoyishi to‘xtatilganini ma’lum qildi. Madaniyat vazirligi holatga izoh berdi.
Vazirlikning bildirishicha, O‘zbekistonda filmni ommaviy namoyish etish ruxsatnoma olish talab qilinadigan faoliyat turi hisoblanadi. Madaniyat vazirligi huzuridagi Kinematografiya agentligi filmni ommaviy namoyish etish uchun bir martalik ruxsatnoma berishga vakolatli organ etib belgilangan.
Amaldagi normativ-huquqiy hujjatlarga ko‘ra, respublika hududida mahalliy va xorijiy filmlarni namoyish etish uchun xususiy tadbirkorlar tomonidan Kinematografiya agentligiga ariza bilan murojaat etiladi hamda agentlik tomonidan ushbu murojaat 10 ish kunida ko‘rib chiqiladi.
Shu bilan birga, filmni ommaviy namoyish etishda bir qator talab va shartlarga qat’iy rioya etilishi belgilangan. Mazkur talab va shartlarga amal qilinmasligi filmni ommaviy namoyish etish uchun berilgan ruxsatnomaning bekor bo‘lishiga olib kelishi ko‘zda tutilgan.
Bundan tashqari, O‘zbekistonda ommaviy tadbirlarni o‘tkazish uchun Ichki ishlar vazirligidan ruxsatnoma olishi shart ekani belgilangan. Biroq, 2—8-aprel kunlari Toshkentda bo‘lib o‘tishi rejalashtirilgan Artdocfest Asia festivali deb nomlangan ommaviy tadbirni o‘tkazish uchun tashkilotchilar O‘zbekiston qonunchiligida belgilangan tartibda ruxsatnoma olmagan.
“Huquqni muhofaza qiluvchi idoralarning rasmiy ravishda ogohlantirishlariga qaramay ommaviy tadbir va filmlar namoyishini tashkil etib, ma’muriy huquqbuzarlik sodir qilgan”, — deyiladi vazirlik xabarida.
Xabar so‘nggida ommaviy tadbirlar, jumladan, festivallar va ularda filmlar namoyishini to‘xtatish Madaniyat vazirligi vakolatiga kirmasligi ham bildirib o‘tilgan.
Izoh (0)