Ijtimoiy tarmoq faollari Toshkent shahrida 20—21-may kunlari o‘tkazilishi rejalashtirilgan Zhara (talaffuzda “Jara” — “Daryo” izohi) xalqaro musiqa festivalini bekor qilishni so‘rab fleshmoblar o‘tkazdi. “Daryo” manbasining ma’lum qilishicha, ushbu noroziliklar fonida festival noma’lum muddatga qoldirilgan.
Zhara festivali haqida
Zhara festivali 2016-yilda Ozarbayjon poytaxti Boku shahrida tashkil etilgan. Har yili bo‘lib o‘tadigan ushbu tadbirda MDH, asosan, Rossiyaning 10 dan ortiq taniqli qo‘shiqchilari chiqish qiladi. Xususan, Grigoriy Leps, Filipp Kirkorov, Ani Lorak, Timati, Valeriy Meladze, Yegor Krid kabi san’atkorlar festivalning faol ishtirokchilari hisoblanadi.
Konsert dasturlari har yili turli shaharlarda o‘tkaziladi. 2019-yilda esa ilk bor MDHdan tashqarida, BAAning Dubay shahrida bo‘lib o‘tgan. So‘nggi uch yilda festival Rossiyaning turli nuqtalarida o‘tkazilgan.
2023-yil mezbonligi uchun 4 xil variant
Festival tashkilotchilari 2023-yilgi konsertni Germaniyaning Dyusseldorf shahrida o‘tkazmoqchi edi. Biroq siyosiy sabablarga ko‘ra, avval Germaniya, so‘ng zaxira variant bo‘lgan Ozarbayjon bu tadbirni o‘tkazishdan bosh tortgan. Shundan so‘ng, shou Qozog‘istonga ko‘chirilgan. Bu haqda rasmiy e’lon berilgan va hatto chiptalar sotuvi ham yo‘lga qo‘yilgandi. Ammo qozoq jamoatchiligining keskin noroziligi tufayli 9—12-mart kunlari Olmaotada bo‘lib o‘tishi rejalashtirilgan konsert dasturi ham bekor qilingan. Festival tashkilotchilari buni “dunyodagi beqaror vaziyat tufayli tadbir sanasi noma’lum muddatga qoldirilgani” bilan izohlagan.
Nega hamma festivalni o‘tkazishdan bosh tortmoqda?
Festivalda o‘z qo‘shiqlari bilan ishtirok etadigan xonandalarning aksariyati rus shou-biznesi vakillari hisoblanadi. Ular orasida Grigoriy Leps, Filipp Kirkorov, Timati, Olga Buzova, Sergey Lazarev kabi Rossiyaning Ukrainadagi urushini ochiqdan-ochiq qo‘llaydigan kremlparast qo‘shiqchilar ham bor. Shu sababli mezbon mamlakat fuqarolari ijtimoiy tarmoqlarda festivalga qarshi keng ko‘lamli virtual norozilik askiyalari uyushtirgan. Ularning fikricha, rossiyalik san’atkorlarning Qozog‘istondagi chiqishlari respublika “Ukrainadagi urushni qo‘llab-quvvatlashini” bildiradi.
Navbat O‘zbekistonga(mi?)
Shundan so‘ng 2023-yilgi festival O‘zbekistonda bo‘lib o‘tishi haqida xabarlar chiqdi. Konsert tashkilotchilari Toshkentga kelib, tadbir o‘tkazilishi rejalashtirilgan “Yangi O‘zbekiston” bog‘iga tashrif buyurdi va OAV uchun matbuot anjumani ham o‘tkazdi.
Rasmiy posterlarda festival 20—21-may kunlari bo‘lib o‘tishi ko‘rsatilgandi. Unda Hammali & Navai, Artik&Asti, Mary Gu, Jony, Yegor Krid, Sergey Lazarev, Natan, Misha Marvin kabi rossiyalik shou-biznes vakillari ishtirok etishi ko‘zda tutilgandi.
#BoycottRussianArmyArtists xeshtegi
Konsert O‘zbekistonga ko‘chirilgani haqidagi xabarlar internetning o‘zbek segmentida katta rezonansga sabab bo‘ldi. Tarmoq faollari ushbu festivalning Toshkentda bo‘lib o‘tishiga turlicha munosabat bildirdi: ayrimlar kremlparast xonandalarning O‘zbekistonda konsert uyushtirishi mamlakatning xalqaro hamjamiyat oldidagi imidjiga salbiy ta’sir ko‘rsatishini aytsa, boshqalar ular shunchaki san’atkor ekanini, bunda hech qanday siyosiy motiv ko‘rmaslik kerakligini bildirdi.
Xususan, bloger Mirzo Zominiy festivalni boykot qilishga chaqirib, xonandalarning aksariyati “o‘ris bosqinini qo‘llab-quvvatlashini” bildirdi.
“Men Z-artistlarning mustaqil O‘zbekistonimiz tuprog‘ida bo‘lishi, kuylashi, ijro etishini ochiqchasiga xohlamayman va ma'qullamayman, chunki ular Kreml tomonidan qo‘llab-quvvatlanadi, Kremlni qo‘llab-quvvatlaydi. Qonxo‘r jinoyatchilar, istilochi va ularning tarafdorlariga sud tilayman. Repost qiling va boykotga chorlang”, — deb yozdi u Telegram’dagi kanalida.
Telegram’da boshlangan aksiya Twitter va Instagram ijtimoiy tarmoqlariga ham ko‘chdi. Statistik ma’lumotlar so‘nggi kunlarda #BoycottRussianArmyArtists xeshtegining o‘sish dinamikasi keskin ko‘tarilganini ko‘rsatmoqda.
Konsert “otmen”mi, “otmen”masmi?
“Daryo”ning hukumatga yaqin manbasining ma’lum qilishicha, Zhara festivali noma’lum muddatga qoldirilgan.
“Ushbu qaror tashkilotchilar tomonidan mustaqil ravishda qabul qilingan”, — deyiladi xabarda.
Sputnik O‘zbekiston nashri esa festival tashkilotchilaridan olgan ma’lumotlariga tayanib tadbir o‘z vaqtida bo‘lib o‘tishi haqida xabar berdi.
“Festival bo‘lib o‘tadi, uning bekor qilingani haqidagi ma’lumotlar ishonchli emas. Hammasi reja bo‘yicha ketyapti. Barcha tomoshabinlarni 20 va 21-may kunlari Toshkentda kutib qolamiz”, — deyiladi Zhara matbuot xizmati munosabatida.
Bundan tashqari, ushbu konsert dasturi uchun chiptalar sotish bilan shug‘ullanayotgan iTicket.uz sayti Instagram’dagi sahifasida festival o‘z vaqtida bo‘lib o‘tishini, faqat rasmiy manbalarga ishonish kerakligini yozdi. Saytda chiptalar sotuvi davom etmoqda.
Shuningdek, Zhara’ning Instagram’dagi rasmiy sahifasida hali ham shou konsert belgilangan muddat — 20—21-may kunlari Toshkent shahrida bo‘lib o‘tishi haqida qayd mavjud.
“Daryo” voqealar rivojini kuzatib boradi.
Izoh (0)