Россиялик режиссёр Виталий Манский Тошкентда ўтаётган ҳужжатли фильмлар фестивалида Украинадаги уруш ҳақида суратга олинган фильм намойиши тўхтатилганини маълум қилди. Маданият вазирлиги ҳолатга изоҳ берди.
Вазирликнинг билдиришича, Ўзбекистонда фильмни оммавий намойиш этиш рухсатнома олиш талаб қилинадиган фаолият тури ҳисобланади. Маданият вазирлиги ҳузуридаги Кинематография агентлиги фильмни оммавий намойиш этиш учун бир марталик рухсатнома беришга ваколатли орган этиб белгиланган.
Амалдаги норматив-ҳуқуқий ҳужжатларга кўра, республика ҳудудида маҳаллий ва хорижий фильмларни намойиш этиш учун хусусий тадбиркорлар томонидан Кинематография агентлигига ариза билан мурожаат этилади ҳамда агентлик томонидан ушбу мурожаат 10 иш кунида кўриб чиқилади.
Шу билан бирга, фильмни оммавий намойиш этишда бир қатор талаб ва шартларга қатъий риоя этилиши белгиланган. Мазкур талаб ва шартларга амал қилинмаслиги фильмни оммавий намойиш этиш учун берилган рухсатноманинг бекор бўлишига олиб келиши кўзда тутилган.
Бундан ташқари, Ўзбекистонда оммавий тадбирларни ўтказиш учун Ички ишлар вазирлигидан рухсатнома олиши шарт экани белгиланган. Бироқ, 2—8 апрель кунлари Тошкентда бўлиб ўтиши режалаштирилган Artdocfest Asia фестивали деб номланган оммавий тадбирни ўтказиш учун ташкилотчилар Ўзбекистон қонунчилигида белгиланган тартибда рухсатнома олмаган.
“Ҳуқуқни муҳофаза қилувчи идораларнинг расмий равишда огоҳлантиришларига қарамай оммавий тадбир ва фильмлар намойишини ташкил этиб, маъмурий ҳуқуқбузарлик содир қилган”, — дейилади вазирлик хабарида.
Хабар сўнггида оммавий тадбирлар, жумладан, фестиваллар ва уларда фильмлар намойишини тўхтатиш Маданият вазирлиги ваколатига кирмаслиги ҳам билдириб ўтилган.
Изоҳ (0)