Gonkongda odamning maymun gerpesi virusi bilan kasallanishining birinchi holati aniqlandi. Bu haqda Dimsum Daily xabar berdi.
Sog‘liqni saqlash vazirligiga ko‘ra, jabrlanuvchi 37 yoshda, surunkali kasalliklari yo‘q.
U kasalxonaga isitmasi ko‘tarilib, hushini yo‘qota boshlaganidan so‘ng yotqizilgan. Bemor hozir shifoxonaning reanimatsiya bo‘limida, — deyiladi xabarda.
Tekshiruvda bemorning orqa miyasidagi suyuqlik namunasida virus mavjudligi tasdiqlandi. Bemor fevral oyi oxirida Cam Shan Country parkiga borganida yovvoyi maymunlardan bu virusni yuqtirib olgan.
Gonkong sog‘liqni saqlash markazi ma’lumotlariga ko‘ra, odam virusni yuqtirganda kasallik belgilari grippga o‘xshaydi.
Kasallik markaziy asab tizimiga ta’sir qilishi mumkin, ammo virus odamdan odamga yuqishi dargumon, — deb ishontirmoqda shifokorlar.
Shahar aholisiga yovvoyi maymunlardan uzoqroq turish, yarani oqar suv bilan yuvish va darhol shifokorlarga murojaat qilish tavsiya etilgan. Maymun gerpesi virusini yuqtirish holatlari avvalroq boshqa mamlakatlarda, jumladan, AQSH, Yaponiya va Kanadada ham qayd etilgan.
Izoh (0)