Toshkentga mahallalar infratuzilmasini yaxshilash uchun 1,4 trln soʻm ajratiladi
Shavkat Mirziyoyev mahallalarda ijtimoiy va ishlab chiqarish infratuzilmasini yaxshilash uchun Toshkent shahriga 1,4 trillion soʻm mablagʻ yoʻnaltirilayotganini maʼlum qildi. Bu haqda Prezident matbuot kotibi xabar berdi.
Xabarga koʻra, “Ochiq budjet” doirasida mahallalar infratuzilmasiga 573 milliard soʻm ajratiladi. Prezident mahallalarni obodonlashtirish, tarmoqlar, yoʻllar, suv inshootlarini taʼmirlash ishlariga yana qoʻshimcha mablagʻ ajratilishini taʼkidladi. Shuning uchun shahardagi 584 ta mahallaning har biriga budjetdan qoʻshimcha 1 milliard soʻmdan, jami yana 584 milliard soʻm ajratishga qaror qilindi.
Bundan tashqari, yigʻilishda poytaxt jamoat transporti sohasida olib borilayotgan va rejalashtirilgan ishlarga toʻxtalib oʻtildi. Prezident yangi liniyada 7 ta stansiya ishga tushganidan soʻng metroda kunlik yoʻlovchilar soni 1 millionga chiqishini taʼkidladi.
“Mana, bugun yangi metro stansiyalarini borib koʻrdik. Yangi liniyada jami 7 ta stansiyalar ishga tushganidan keyin, metroda kunlik yoʻlovchilar soni 1 millionga chiqadi”, — dedi davlat rahbari.
Qayd etilishicha, haharda tirbandlikni qisqartirish, odamlarning uzogʻini yaqin qilishga qaratilgan bu ishlar davom ettirilishi taʼkidlandi. Jumladan:
- 1-aprelga qadar qoʻshimcha 1 mingta avtobus olib kelinadi;
- 25 ta koʻchada avtobuslar uchun alohida yoʻlaklar tashkil etiladi;
- yil yakunigacha 233 ta chorrahadagi svetoforlarni yoʻlovchi oqimiga qarab boshqarish tizimi joriy qilinadi;
- 20 ta oqim yuqori koʻchalarda xususiy sheriklik asosida jami 10 ming oʻrinli parkomatlar tashkil qilinadi;
- Chilonzor, Yunusobod va Yashnobod tumanlaridagi shaharga olib kiruvchi 6 ta metro bekati atrofida avtoturargohlar tashkil qilinib, tayyor biznes sifatida auksionga chiqariladi.
