Meksikadagi saylovlarda 22 nafar siyosiy nomzod halok bo‘ldi

Meksikada o‘tayotgan shtatlar meriyasiga saylovlarda shu paytga qadar 22 nafar siyosiy nomzod halok bo‘ldi. Bu haqda Anadolu nashri xabar berdi.

Xabarda aytilishicha, Meksikaning markaziy Guanaxuato shtatidagi Selaya shahrida merlikka nomzod Jisela Gaytan shu hafta saylovoldi tashviqotini boshlaganida otib o‘ldirilgan. Bu kabi holatlar so‘nggi haftada nihoyatda ko‘paygan.

2023–2024-yillar uchun saylov kampaniyasida qotilliklar sezilarli oshgan. Hozirga qadar 22 nafar nomzod o‘ldirilgani maʼlum.

Siyosiy nomzodlar saylov kampaniyasi oldidan hukumatga murojaat qilib, himoya so‘ragan. Hukumat esa xavotirlar o‘rinsiz ekanligini bildirgan.

Guanaxuato shtati hozirda rasman eng xavfli shtatga aylanib qolgan. Eng ko‘p qotilliklar shu hududda amalga oshirilgan.

Guanaxuato shtatida mart oyi so‘nggiga qadar 401 ta qotillik sodir etilgan. Nomaʼlum jinoyatchilar 9 nafar siyosiy nomzodni ham o‘ldirgan.

Oldinroq Meksikada shtatlar merligiga mamlakat jinoiy to‘dalari ham o‘z vakillarini taklif etgan edi. Hukumat esa buni rad etgan. Oqibatda amaldagi nomzodlarga nisbatan “ov” eʼlon qilingan.

2-iyun kuni Meksikada umumiy saylovlar o‘tkazilishi rejalashtirilgan. Saylovchilar yangi prezidentni olti yillik muddatga saylaydi.