Ichki ishlar vazirligi terrorchilik xurujlari haqida tarqalgan chaqiriqlar bo‘yicha munosabat bildirdi.
Maʼlum qilinishicha, oxirgi vaqtlarda dunyoning turli mamlakatlarida sodir etilgan terrorchilik harakatlaridan so‘ng, O‘zbekiston hamda qo‘shni davlatlar fuqarolariga internet ijtimoiy tarmoqlari orqali pul mukofoti evaziga savdo va ko‘ngilochar markazlar, maktablar va boshqa jamoat joylarini minalashtirish taklif qilingan xabarlar kelib tushmoqda.
Bu kabi provokatsion xabarlar, asosan, Telegram orqali yuborilib, unda nomaʼlum shaxslar turli miqdorda pul to‘lash, qurol-yarog‘ bilan taʼminlash va harakatlar rejasini yuborishga vaʼda berib, ushbu harakatlarga rad javobini eʼtiborga olmaydi.
“Eng xavfli jihati shuki, yovuz niyatli shaxslarning xabarlari ko‘p hollarda bolalarga yuborilmoqda. Shuningdek, bolalarning shaxsiy maʼlumotlari orqali ularni qo‘rqitish holatlari kuzatilmoqda. Provokatorlar o‘zlarining fotosuratlari va raqamlarini yashirgan holda faoliyat yuritadilar.
Hurmatli fuqarolar! Agarda sizga bu kabi xabarlar kelsa, vahimaga tushmang va ularni ochiq chatlar, tanishlaringiz va do‘stlaringizga yubormay, darhol 102 raqamiga qo‘ng‘iroq qilib, ichki ishlar organlariga xabar bering. Xabar yuboruvchilarni bloklang va ular bilan yozishma va suhbatga kirishmang.
Yodingizda tuting, firibgarlar jamoatchilik orasida vahima uyg‘otish uchun bu kabi xatti-harakatlarni amalga oshirmoqda! Respublika huquq-tartibot organlari esa xavfsizlikka bo‘lgan har qanday tahdidlarni bartaraf qilish borasida o‘z vakolatlari doirasida barcha choralarni ko‘rmoqda”, — deyiladi xabarda.
Izoh (0)