Prezidentning “Ijod maktablari faoliyatini yanada takomillashtirish chora-tadbirlari to‘g‘risida”gi qarori qabul qilindi. Bu haqda “Huquqiy axborot” Telegram-kanali xabar berdi.
Maʼlum qilinishicha, 2024/2025-o‘quv yilidan Ixtisoslashtirilgan taʼlim muassasalari agentligi tizimidagi ijod maktablarida ijtimoiy va ijodiy faol, keng jamoatchilik o‘rtasida obro‘-eʼtibor qozongan adiblar va jamoat arboblari ishtirokida mahorat darslari o‘tkaziladi.
Shuningdek, yosh tarjimonlar klublari faoliyati yo‘lga qo‘yiladi. Bundan tashqari, matnshunoslik darslari tashkil etiladi.
Shu bilan birga:
- har yili 2 marotaba o‘quvchilarning “Ijod bog‘idan guldasta” nomli to‘plamlarini nashr etish amaliyoti yo‘lga qo‘yiladi;
- tasviriy sanʼat va chizmachilik fani negizida sanʼat (art) fani kiritiladi;
- 7–9-sinflarning texnologiya fani doirasida robototexnika asoslari o‘rgatiladi.
2024/2025-o‘quv yilidan umumiy o‘rta taʼlim muassasalari o‘quvchilari o‘rtasida badiiy adabiyot va sanʼat sohasida iqtidorli yoshlarni saralashga qaratilgan ko‘rik-tanlov o‘tkaziladi.
Har yili “Mening birinchi kitobim” loyihasi doirasida har bir ijod maktabidan kamida ikki nafar o‘quvchining ijodiy ishlar to‘plami nashr etiladi. Anʼanaviy “Zomin seminari”da har bir ijod maktabidan kamida 5 nafardan ijodkor o‘quvchilarning ishtiroki taʼminlanadi.
Har bir ijod maktabi “Turkiy adabiyot durdonalari” nomli 100 jilddan iborat kitoblar majmuasi bilan taʼminlanadi. Ijod maktablari oliy taʼlim muassasalari va O‘zbekistonning xorijiy davlatlardagi elchixonalariga biriktiriladi.
Izoh (0)