Iqlim maʼlumotlari va kuzatilgan mart oylari kabi 2024-yilning mart oyi ham odatdagidek bo‘ldi. Bu haqda “O‘zgidromet” xabar berdi.
Maʼlum qilinishicha, oyning birinchi o‘n kunligi harorat tartibi bo‘yicha meʼyordan 1-4 darajaga sovuqroq, ikkinchi o‘n kunligi esa meʼyorga yaqin, baʼzi joylarda meʼyordan 1-2 darajaga sovuqroq bo‘ldi. Uchinchi o‘n kunlik eng iliq — odatdagidan 1-2 darajaga iliq bo‘ldi.
Hududning katta qismida o‘rtacha oylik havo harorati o‘rtacha ko‘p yillik qiymatlarga yaqin bo‘ldi. Mart oyida bir nechta sovuq to‘lqinlar kuzatildi. Respublikaning shimolida, janubida va Farg‘ona vodiysida eng past havo harorati birinchi o‘n kunlikda - shimolda 6-11 daraja sovuq, janubda va Farg‘ona vodiysida 0-5 daraja sovuq, Surxondaryo viloyatining ayrim joylarida va Qashqadaryo viloyatining tog‘oldi hududlarida 7-9 daraja sovuq qayd etildi.
Odatda mart oyida eng sovuq havo kirib kelmaydigan respublikaning eng chekka janubida havoning bunday kuchli sovishi, sirkulyatsiyaga toroposferaning o‘rta qatlamlaridan sovuq tortilishida yuqori siklon vujudga kelishi bilan bog‘liq. Eng kuchli sovuq to‘lqinlar markaziy hududlarda haroratni 2-7 daraja sovuqqacha, baʼzi joylarda 10 daraja sovuqqacha pasayishda oyning o‘rtalarida kuzatildi.
Mart oyining uchinchi o‘n kunligida havo eng iliq bo‘ldi. Kunduzi havo harorati 25-28 daraja iliqqacha, shimolda va janubda 29-30 daraja iliqqacha ko‘tarildi.
O‘tgan mart oyida harorat rekordlari qayd etilmadi. O‘zbekiston hududi bo‘yicha minimal va maksimal havo harorati 1961–2023-yillar davridagi minimal va maksimal harorat qiymatlariga, shuningdek, kuzatuvlarning butun qatori uchun mutlaq minimal va maksimal darajaga yetmadi. Hududning ko‘pchilik qismida mart oyida oylik yog‘ingarchilik miqdori meʼyordan ko‘p va meʼyor atrofida, Farg‘ona vodiysi va respublika janubida baʼzi joylarda meʼyordan kam bo‘ldi.
Birinchi va ikkinchi o‘n kunliklarda O‘zbekistonning tekislik hududlarida yomg‘ir qorga aylanishi holatlari kuzatildi, bunda qisqa muddatli qor qoplami hosil bo‘ldi. Markaziy va hatto janubiy viloyatlarda qor balandligi 4-25 sm ga yetdi.
Ayrim kunlarda respublika bo‘yicha baʼzi joylarda momaqaldiroq va shamolning kuchayishi bilan kuchli yomg‘irlar yog‘di. Toshkent, Navoiy, Samarqand, Jizzax, Qashqadaryo, Surxondaryo viloyatlarining tog‘ oldi va tog‘li hududlarida bir kecha-kunduzda yog‘ingarchilik miqdori oylik normaning 30-60 foizga yetdi.
12-mart kuni Toshkentda 27 mm yomg‘ir yog‘di, bu mart oyi meʼyoridan 40 foizni tashkil etadi. Toshkent, Navoiy, Samarqand, Qashqadaryo, Surxondaryo viloyatlarining tog‘ oldi va tog‘li hududlarida sel-suv toshqin hodisalari va hududlarni suv bosishi qayd etildi.
Izoh (0)