Исроил мудофаа кучлари томонидан 14 кун давомида қамал қилинган Ал-Шифо касалхонасидан 300 дан ортиқ фаластинлик жасадлари топилди. Бу ҳақда CNN нашри хабар берди.
Бир қанча интернет нашрлари Исроил армияси тарк этган Ал-Шифо касалхонасининг штурмдан кейинги сунъий йўлдош тасвирларини эълон қилган. Уларда бино ҳудудининг тўла вайрон бўлганини кузатиш мумкин.
Maxar Technologies манбасига кўра,14 кунлик қамал пайтида бино вайрон қилинган ва унинг айрим қисмлари бульдозерлар билан текислаб ташланган. 1 апрель куни олинган суратлар бу маълумотни тасдиқлайди.
Ғазо фуқаролик мудофааси ташкилоти маълумотларига кўра, ҳозиргача мажмуада камида 300 жасад топилган. Текширув давомида бу рақам яна кўпайиши мумкинлиги айтилган.
Ғазо расмийларидан капитан Маҳмуд Бассал CNN телеканалига берган интервьюсида жароҳатланганлар ва ўликлар касалхона ҳудудини тўлдириб бораётганини айтган.
Исроил бош вазири Биньямин Нетаньяху 31 март куни шифохона ҳудудида 200 дан ортиқ ҲАМАС аскари ўлдирилганини маълум қилган эди. Исроил мудофаа кучлари бир неча бор Ал-Шифо мажмуаси қуролли жангарилар томонидан фойдаланилганини даъво қилган эди.
Изоҳ (0)