Киевнинг ҳужумлари фаоллашуви ортидан Россиянинг Украина билан чегарадош Белгород вилоятидан 5 минг нафар бола фавқулодда эвакуация қилинди. Бу ҳақда The Moscow Times нашри хабар берди.
Хабарда айтилишича, ўтган ҳафтада содир этилган трансчегаравий отишмалар ва ўндан ортиқ тинч аҳоли вакиллари ҳалок бўлиши маҳаллий ҳукуматни эвакуация режаси ишлаб чиқишга мажбур этган. Ушбу режа асосида жами 9 минг нафар вояга етмаганлар бошқа ҳудудларга кўчирилиши хабар қилинган.
“Беш минг нафарга яқин болалар аллақачон вилоятдан ташқарида. Кеча улардан 1300 нафари Санкт-Петербург, Брянск ва Махачқалъага етиб борди”, — дейилади Белгород губернатори Вячеслав Гладков хабарида.
Вилоятда қолган ва чегарага яқин муниципалитетларда, жумладан, минтақанинг пойтахти Белгородда яшовчи болалар масофавий таълимга ўтказилиши, мактаблар бўшатилиши маълум қилинган.
29 март куни Украина учувчисиз самолёти Белгород шаҳрида кўп қаватли уйга қулаб тушган эди. Оқибатда бир киши ҳалок бўлиб, яна икки нафар фуқаро тан жароҳати олган. Ҳалокат ва отишмалар доимий содир бўлаётгани туфайли фаол эвакуация давом эттирилмоқда.
Изоҳ (0)