Xitoyning CITIC Construction kompaniyasi O‘zbekistonning yo‘l qurilishi sohasiga qiziqish bildirmoqda. Bu haqda Transport vazirligi matbuot xizmati xabar berdi.
Ma’lum qilinishicha, 27-mart kuni vazirlikda ushbu kompaniya bilan avtomobil yo‘llarini qurish va rekonstruksiya qilish yo‘nalishidagi loyihalar muhokamasiga bag‘ishlangan navbatdagi uchrashuv bo‘lib o‘tdi.
Kompaniya Pungan—Namangan, Toshkent—Chinoz avtomobil yo‘llarini rekonstruksiya qilish bilan birga yangi pullik yo‘llarni qurish bo‘yicha o‘z xalqaro tajribasi bilan O‘zbekistonning transport infratuzilmasini yaxshilashda qurilish sohasidagi zamonaviy yechimlarni qo‘llagan holda ishtirok etish xohishini bildirdi.
Transport vaziri o‘z navbatida ushbu yo‘llar xalqaro standartlarga javob beradigan, zamonaviy texnologiyalarni qo‘llagan holda qisqa vaqtda qurilishi hamda qurilish tannarxini arzonlashtirishga alohida e’tibor qaratilishi lozimligini ta’kidlab o‘tdi.
Xorij kompaniyasi loyihalarni o‘rganish ishlarini olib borayotgani, yaqin kunlarda barcha talablarga javob beradigan loyiha takliflarini taqdim etishini ma’lum qildi.
O‘zbekistondagi ilk pulli yo‘llarning qurilishi haqida 2018-yilda xabar berilgandi. O‘shanda bu kabi yo‘llarning birinchisini qurish bilan Germaniyaning GP Günter Papenburg kompaniyasi shug‘ullanishi mumkinligi aytilgandi. 2019-yilda Avtomobil yo‘llari qo‘mitasi O‘zbekistondagi ilk pulli trassani qurish uchun joy tanlanayotganini ma’lum qilgandi.
2023-yilda Turkiyaning Cengiz Holding kompaniyasi O‘zbekistonda pulli avtomobil yo‘llarini qurish loyihalarida ishtirok etishga qiziqish bildirdi.
Izoh (0)