Terma jamoalar o‘rtasidagi bahslar yakunlangach, futbolchi o‘z klublariga qaytdi. Yana tomoshabinlar sevgan klublar futboli start olmoqda.
Mavsumning qizg‘in pallasiga kirib borishdan oldin top-ligalarda qanday seriyalar qayd etilganiga to‘xtalib o‘tamiz.
G‘alabali seriya: “Sporting” o‘z uyida yengilmas, “Arsenal” esa yo‘lidan chiqqan raqibni ayamayapti
3 ta klubni ajratib ko‘rsatamiz:
“Galatasaroy” — ketma-ket 11 ta g‘alaba. Turkiya jamoasi uchun mavsum ajoyib o‘tmoqda: 30 ta o‘yinda 26 ta g‘alaba. Jamoa mavsum boshidayoq 10 ta ketma-ket g‘alabani qo‘lga kiritgandi. Endi esa bu ko‘rsatkich yana ham yaxshilangan. “Galatasaroy”ning keyingi o‘yini xavfli zonada borayotgan “Xatayspor”ga qarshiligini hisobga olsak, klub natijani yana yaxshilaydi.
“Arsenal” — ketma-ket 8 ta g‘alaba. To‘plar nisbati esa 33:4. Londonliklar buni davom ettira oladimi? Oldinda esa “Manchester Siti”ga qarshi mehmondagi o‘yin kutib turibdi.
“Sporting” — o‘z maydonida 13 ta g‘alaba. Barchasi ushbu mavsumda, to‘plar nisbati — 46:10. Keyingi o‘yin “Benfika”ga qarshi. “Sporting” o‘tgan mavsumda ham 17 ta o‘yinda 13 ta g‘alaba bo‘lgan.
Mag‘lubiyatsiz seriyalar: “Real” va “Inter” kurash olib bormoqda
“Dinamo” Moskva — 11 o‘yindan buyon mag‘lub bo‘lmayapti. Klub joriy mavsum RPLda eng kam mag‘lub bo‘lgan jamoa: 2 ta mag‘lubiyat. Sentyabr oyida “Spartak”ka imkoniyat boy berilganidan so‘ng 6 ta g‘alaba va 5 ta durang qayd etdi.
“Fenerbahche” — 19 ta mag‘lubiyatsiz o‘yin. So‘nggi bor noyabr oyida “Trabzonspor”ga qarshi o‘yindagi muvaffaqiyatsizlikdan so‘ng jamoa 15 ta g‘alaba va 4 ta durang qayd etdi.
“PSJ” — 21 o‘yinlik mag‘lubiyatsiz seriya. Parijliklar sentyabrda “Nitssa”ga 2:3 hisobida mag‘lub bo‘lgandi. Shundan buyon 15 ta g‘alaba va 6 ta durang natija qayd etdi. Endi-chi? “PSJ”ning keyingi o‘yini safarda “Marsel”ga qarshi. Qayd etib o‘tish joiz, “PSJ” mehmondagi o‘yinlarda 20 ta o‘yindan buyon mag‘lub bo‘lmayapti.
“Inter” — 23 ta mag‘lubiyatsiz o‘yin. “Sassuolo”dan (sentyabr) boshqa hech bir jamoa milanliklarni mag‘lub eta olmayapti. “Nerazzuri” 19 ta g‘alaba va 4 ta durang qayd etdi.
“Real” — 23 o‘yindan beri mag‘lubiyat nimaligini bilmayapti. Xuddi “Inter” kabi. Madridliklar ham sentyabrda “Atletiko”ga mag‘lub bo‘lgandan buyon boshqa hech kimga imkoniyat qolmayapti: 17 ta g‘alaba va 6 ta durang.
“Qaymoqranglilar”ning keyingi raqibi oson emas — “Atletik”. So‘ngra “Malyorka” va “Barselona”ga qarshi o‘yinlar kutib turibdi.
“Bayer” va “PSV” umuman mag‘lub bo‘lmayapti
“Bayer” barcha musobaqalarda (Bundesliga, Germaniya Kubogi va Yevropa Ligasi) 38 ta o‘yindan buyon mag‘lubiyat nimaligini bilmayapti. Liganing 26 ta o‘yinida mag‘lubiyat degan joyida 0 turishi — g‘ayritabiiy holat. Ushbu mavsumda “Bayer”ni faqat “Karabax” yengishga yaqin kelgandi, biroq ikkala o‘yinda ham nemislar so‘nggi daqiqlarda mag‘lubiyatdan qutulib qoldi.
“PSV” Niderlandiya chempionatida hali mag‘lub bo‘lmadi — 23 ta g‘alaba va 3 ta durang. Boshqa turnirlarda esa omadsizliklar bo‘ldi — Chempionlar Ligasida “Arsenal” va “Borussiya D”ga mag‘lub bo‘ldi, Kubok bahsida esa “Feyenoord” “PSV” ustidan g‘alaba qozondi.
Niderlandiya ligasida esa “PSV”ning mag‘lubiyatsiz seriyasi o‘tgan mavsum bilan qo‘shib hisoblasa 39 taga yetgan. Jamoaning chempionatdagi so‘nggi mag‘lubiyati 2023-yil yanvar oyida yuz bergan.
G‘alabasiz seriyalar: “Everton” va “Volfsburg”
APLda “Luton” 8 o‘yindan buyon g‘alaba qozona olmayapti, “Everton” esa dekabrdan buyon g‘olib bo‘lmadi. Allaqachon 11 ta o‘yin o‘tib bo‘ldi. Liverpulliklarning bu seriyasi davom etishi mumkin, chunki keyingi o‘yin “Bornmut” va “Nyukasl”ga qarshi.
A Seriyada “Salernitana” 11 o‘yindan buyon zafar quchmayapti. Jamoa noyabr oyida bitta, dekabrda bitta o‘yinda g‘alaba qozongan. 2024-yilda esa 2 ta durang va 9 ta mag‘lubiyat qayd etdi.
“Volfsburg”da esa 11 o‘yinlik g‘alabasi seriya. Dekabr o‘rtasida g‘alaba qozongan nemis klubi shundan buyon 6 ta durang va 5 ta mag‘lubiyatga erishdi.
“Darmshtadt”da esa ishlar ancha yomon. Jamoa 19 o‘yindan buyon g‘alaba nimaligini bilmayapti.
Izoh (0)