Намангандаги боғчада тарбиячилар болага руҳий босим ўтказиб, уни ҳақорат қилгани аниқланди. Болалар омбудсмани ҳолат юзасидан маълумот берди.
Қайд этилишича, болалар омбудсмани котибиятига ишонч телефони орқали Наманган вилоятида яшовчи фуқародан мурожаат келиб тушди. Унинг 2019 йилда туғилган фарзанди М.Х. (ўғил бола) Поп туманидаги давлат мактабгача таълим ташкилотига қатнашини, 21 февраль куни ушбу таълим ташкилотида педагог ходимлар гуруҳдаги болаларни қаровсиз қолдиргани, бу ҳолатдан хабар топган ота педагог ходимларга эътироз билдирганини маълум қилган.
Шундан сўнг тарбиячилар болага руҳий босим ўтказиб, уни ҳақорат қилгани учун юқоридаги ходимларга нисбатан қонуний чора кўриб, фарзандининг ҳуқуқлари ҳимоя қилинишини сўраган. Болалар омбудсмани сўрови асосида Мактабгача ва мактаб таълими вазирлиги ҳузуридаги Мактабгача таълим агентлиги ушбу ҳолатни атрофлича ўрганди.
Ўрганиш натижасида Поп тумани мактабгача ва мактаб таълими бўлими ходимлари тарбиячи ва унинг ёрдамчилари ўз хизмат вазифаларига лоқайдлик билан муносабатда бўлгани сабабли ташкилот директорининг буйруғига кўра уларга нисбатан Меҳнат кодексининг 312-моддаси 1-бандига асосан ҳайфсан интизомий жазо чораси қўлланди.
Изоҳ (0)