Avstraliyaning Kvinslend shtatidagi entomolog ilgari noma’lum bo‘lgan hasharotni topdi. Bu haqda BBC xabar berdi.
Hasharot Jeyms Tvid tomonidan 2021-yil dekabrida lagerga qilgan safari chog‘ida kashf etilgan va dastlab uni qush axlati deb o‘ylashgan.
“Bu mutlaqo noyob mavjudot. Xuddi shunday sifatlarga ega hasharotlar juda kam”, — deydi Tvid.
Entomolog diqqat bilan hasharotni ko‘zdan kechirib, bunday turdagi hasharot avval aniqlanmagani sababli uni o‘rganishga kirishgan.
“Uning uzunligi taxminan bir santimetr va uzun momiq tuklar bilan qoplangan”, — deydi Jeyms Tvid.
Kvinslend universitetida doktorlik dissertatsiyasi ustida ishlayotgan entomolog o‘z topilmasini mamlakatdagi barcha hasharotlar hisobini yurituvchi Avstraliya hukumati tadqiqot markaziga olib kelgan.
“Men milliy markazdagi bir nechta hamkasblar bilan ishladim, ular qo‘ng‘izlar guruhi haqida to‘liq kitob yozgan. Avstraliya va butun dunyo muzeylarida o‘n minglab namunalarni o‘rganib, ular bunday qo‘ng‘izni ilgari hech qayerda ko‘rishmaganini aytishdi. Men unga o‘xshash boshqa tukli hasharotlarni bilmayman”, — deydi Tvid.
Yangi qo‘ng‘iz ilgari ma’lum hasharotlardan shunchalik farq qiladiki, avstraliyalik olimlar uni uzun shoxli qo‘ng‘izlarning alohida turlari vakili sifatida tan olgan. Unga lotincha Excastra albopilosa nomi berilgan (excastra “chodir lageridan” va albopilosa “oq va tukli” deb tarjima qilinishi mumkin).
“Agar biz bundan hasharotlar mavjudligini bilmasak, turlarni saqlab qolish qiyin. Bu qo‘ng‘iz e’tiborni jalb qilgani yaxshi, u hasharotlar va ularni saqlash zaruriyatini targ‘ib qilishga yordam beradi”, — deydi entomolog.
Izoh (0)