AQSH va Buyuk Britaniya havo kuchlari Yamandagi husiylar obyektlariga hujum uyushtirdi. Bu haqda arab nashrlari manbalariga asoslanib, IRNA nashri xabar berdi.
Al Mayadeen nashriga ko‘ra, chorshanba kuni kechasi AQSH boshchiligidagi havo hujumi g‘arbiy Al-Hudayda provinsiyasidagi Al-Mina tumani hududida sodir etilgan. Hujum oqibatida halok bo‘lganlar va yaralanganlar soni hozircha nomaʼlum.
Vashington va London kuchlari Yamanning “Ansorulloh” guruhiga nisbatan ilk hujumni 11-yanvar kuni amalga oshirgan edi. Koalitsiya aʼzolari bu harakatlarini Qizil dengizdagi kemalar harakatini to‘xtatib qo‘ygan husiylarga nisbatan jazo chorasi deb eʼlon qilgan.
Yaman husiylari 19-noyabrdan beri Qizil dengiz va Sudan bo‘g‘ozida transport va harbiy kemalarga hujumlar uyushtirib keladi. Guruh masʼullari Qizil dengizdagi harbiy manyovrlar faqat Isroil kemalariga nisbatan qo‘llanilayotgani, G‘arb yuk tankerlari uchun hech qanday xavf mavjud emasligini taʼkidlagan. Biroq Qizil dengizda turgan G‘arb koalitsiya qo‘shinlari Yevropa va Amerikadan kelgan yuk kemalariga hujum qilish bilan bog‘liq bir nechta holatni qayd etgan.
Yaman husiylari Isroil rejimi G‘azodagi genotsidni to‘xtatmaguncha va Falastin hududiga gumanitar yordam kirib kelishiga ruxsat bermaguncha Isroilga qarshi operatsiyalarini davom ettirishini bildirgan.
Izoh (0)