АҚШ ва Буюк Британия ҳаво кучлари Ямандаги ҳусийлар объектларига ҳужум уюштирди. Бу ҳақда араб нашрлари манбаларига асосланиб, IRNA нашри хабар берди.
Al Mayadeen нашрига кўра, чоршанба куни кечаси АҚШ бошчилигидаги ҳаво ҳужуми ғарбий Ал-Ҳудайда провинциясидаги Ал-Мина тумани ҳудудида содир этилган. Ҳужум оқибатида ҳалок бўлганлар ва яраланганлар сони ҳозирча номаълум.
Вашингтон ва Лондон кучлари Яманнинг “Ансоруллоҳ” гуруҳига нисбатан илк ҳужумни 11 январь куни амалга оширган эди. Коалиция аъзолари бу ҳаракатларини Қизил денгиздаги кемалар ҳаракатини тўхтатиб қўйган ҳусийларга нисбатан жазо чораси деб эълон қилган.
Яман ҳусийлари 19 ноябрдан бери Қизил денгиз ва Судан бўғозида транспорт ва ҳарбий кемаларга ҳужумлар уюштириб келади. Гуруҳ масъуллари Қизил денгиздаги ҳарбий манёврлар фақат Исроил кемаларига нисбатан қўлланилаётгани, Ғарб юк танкерлари учун ҳеч қандай хавф мавжуд эмаслигини таъкидлаган. Бироқ Қизил денгизда турган Ғарб коалиция қўшинлари Европа ва Америкадан келган юк кемаларига ҳужум қилиш билан боғлиқ бир нечта ҳолатни қайд этган.
Яман ҳусийлари Исроил режими Ғазодаги геноцидни тўхтатмагунча ва Фаластин ҳудудига гуманитар ёрдам кириб келишига рухсат бермагунча Исроилга қарши операцияларини давом эттиришини билдирган.
Изоҳ (0)