Qo‘qon aeroportiga ilk texnik parvoz amalga oshirildi

Farg‘ona viloyatida “Qo‘qon” aeroportini rekonstruksiya qilish ishlari yakunlandi, deb xabar beradi Uzbekistan Airports.

Qayd etilishicha, 20-mart kuni ertalab aeroport birinchi texnik parvozni qabul qildi — Uzbekistan Airways aviakompaniyasining A320 Neo samolyoti ekipaji Qo‘qon aeroportiga qo‘ndi.

Viloyat aeroportida uchish-qo‘nish yo‘lagi 2000 metrgacha uzaytirilgan hamda A320 va ATR72-600 rusumli samolyotlar uchun ikkita to‘xtash joyiga ega perron rekonstruksiya qilingan. Shuningdek, aeroportda 100 kishiga mo‘ljallangan 900 kvadrat metr maydonli yangi yo‘lovchi terminali qurilgan.

Uzbekistan Airways aviakompaniyasining tajribali uchuvchilari tomonidan Toshkent—Qo‘qon yo‘nalishi bo‘yicha amalga oshirilgan texnik parvoz aerodromning samolyotlarni qabul qilish va jo‘natishga hamda terminalning yo‘lovchilarni qabul qilish va ularga xizmat ko‘rsatishga to‘liq tayyorligini ko‘rsatdi, — deyiladi xabarda.

Muntazam parvozlarni 2024-yil 1-apreldan boshlash rejalashtirilgan.