Kambag‘allikni qisqartirish va bandlik vazirligi hamda Sog‘liqni saqlash vazirligining “Ayollarning og‘ir yuklarni ko‘tarishi va tashishi chog‘ida ular uchun yo‘l qo‘yiladigan eng ko‘p yuklamalar normasini tasdiqlash haqida”gi qarori loyihasi jamoatchilik muhokamasiga qo‘yildi.
Loyiha qabul qilinishi natijasida ayollar, shuningdek homilador ayollar uchun mehnat jarayonida og‘ir yuklarni qo‘lda ko‘tarish va tashishda yo‘l qo‘yilishi mumkin bo‘lgan yuklamalarning ruxsat etilgan me’yorlari belgilanishi ta’minlanadi.
Ayollar uchun og‘ir yuklarni qo‘lda ko‘tarish va tashishda yo‘l qo‘yilishi mumkin bo‘lgan yuklamalarning ruxsat etilgan normalari
- Boshqa ishlarga almashlab ishlash sharti bilan yukni ko‘tarish va ko‘chirishda uning vazni 9 kilodan oshib ketmasligi lozim.
- Ish smenasi davomida doimiy ravishda ko‘tariladigan yukning vazni 6 kg dan oshib ketmasligi kerak.
- Ish smenasining har bir soatida ishchi yuzadan ko‘chiriladigan yuklarning yig‘indi vazni 300 kilodan oshib ketmasligi kerak.
- Ish smenasining har bir soatida poldan ko‘chiriladigan yuklarning yig‘indi vazni 150 kilodan oshib ketmasligi kerak.
- Ish smenasi davomida ishchi yuzadan ko‘chiriladigan yuklarning yig‘indi vazni 2500 kilodan oshib ketmasligi kerak.
- Smena davomida poldan ko‘chiriladigan yuklarning yig‘indi vazni 1250 kilodan oshib ketmasligi kerak.
- Ikki kishi birgalikda zambilda tashiladigan yuklarning chegaraviy vazni 22 kilodan oshib ketmasligi kerak. barcha ishlarda oyoqchali zambillaridan foydalanishga yo‘l qo‘yilmaydi.
- Bitta g‘ildirakli aravada og‘ir yuklarni ko‘chirishda yukning chegaraviy vazni 25 kilodan oshib ketmasligi kerak. Bitta g‘ildirakli aravada og‘ir yuklarni tashishga faqat sirpanchiq yog‘ochda bajarilgandagina yo‘l qo‘yiladi. Bunda chegaraviy ko‘tarish (eng yuqori balandlikning yo‘lning uzunligiga nisbati) 0,02 dan oshib ketmasligi lozim.
- Og‘ir yuklarni uch va to‘rt g‘ildirakli aravachalarda tashishda yukning chegaraviy vazni 50 kilodan oshib ketmasligi kerak. Bunda notekis yuzada tashishga chegaraviy ko‘tarish ko‘rsatkichi 0,01 bo‘lgan holda ruxsat etiladi.
- og‘ir yuklarni ikki g‘ildirakli qo‘l aravachada tashilganda yukning chegaraviy vazni 60 kilodan oshib ketmasligi kerak, bunda polning tekis yuzasida tashishga chegaraviy ko‘tarish ko‘rsatkichi 0,02 bo‘lgan holda, notekis tuproq yoki tosh yo‘lda chegaraviy ko‘tarish ko‘rsatkichi 0,01 dan oshib ketmagan holda ruxsat etiladi.
- Og‘ir yuklar vagonetkalarda tashilganda yukning chegaraviy vazni 300 kilodan oshib ketmasligi kerak. Bunda ko‘tarish ko‘rsatkichi 0.01 dan oshib ketmagan holda faqat relslarda harakatlanishga ruxsat etiladi.
Homilador ayollar bel sohasidan yuqori bo‘lgan mehnat predmetlarini ko‘tarish bilan, poldan ko‘tariladigan mehnat predmetlari, oyoq mushaklarini va qorin atrofi mushaklarini pressini statik zo‘riqishini paydo bo‘lishi bilan, majburiy ish holatida turish (cho‘kkalab o‘tirish, tizzasi bilan o‘tirish, egilgan holatda turish, qorni va ko‘kragi bilan asbob-uskunalarga hamda mehnat predmetlariga tayangan holda turish), tanani 15 darajaga burgan holatda turish bilan bog‘liq bo‘lgan ishlab chiqarish operatsiyalarini bajarishlari mumkin emas.
Shuningdek:
- boshqa ishlarga almashlab ishlash sharti bilan yukni ko‘tarish va ko‘chirishda uning vazni (1 soatda 2 martadan) 2,5 kilodan oshib ketmasligi lozim.
- ish smenasi davomida doimiy ravishda ko‘tariladigan va tashiladigan yukning vazni 1,25 kilodan oshib ketmasligi kerak.
- ish smenasining har bir soatda ishchi yuzadan 5 metrgacha bo‘lgan masofaga ko‘chiriladigan yuklarning yig‘indi vazni 60 kg dan oshib ketmasligi kerak, poldan ko‘tarishga ruxsat etilmaydi.
- 8 soatlik ish smenasida ishchi yuzadan ko‘chiriladigan yuklarning yig‘indi vazni 480 kilodan oshib ketmasligi kerak.
Homilador ayollar uchun oyoq pedalidan foydalanib boshqariladigan asbob-uskunalarda ishlaydigan ishlar, asab-emotsional zo‘riqish bilan kechadigan konveyerdagi majburiy ritmdagi ishlar mustasno qilinadi.
Ushbu normalar mulkchilik shaklidan qat’i nazar, barcha vazirliklar, idoralar, korxonalar, tashkilotlar va muassasalar, shuningdek, ayrim fuqarolar ixtiyorida mehnat shartnomasi (kontrakt) bo‘yicha ishlayotgan jismoniy shaxslarning mehnatga oid munosabatlarida qo‘llanishi majburiydir.
Izoh (0)