Qashqadaryo viloyatining Dehqonobod tumanida 35 yildan beri shar’iy nikoh asosida yashab kelgan er-xotin nikohi rasmiylashtirildi. Bu haqda “Daryo”ga Dehqonobod tuman FHDY bo‘limi mudirasi Ozoda Ashurova xabar berdi.
Bildirilishicha, tuman FHDY bo‘limi hamda Davlat xizmatlari markazi xodimlari chekka hududlarga borib, uzoq yillar davomida shar’iy nikohda bo‘lgan, ayrim muammolar sabab nikohi rasmiy ro‘yxatga olinmagan fuqarolar muammosini o‘rgangan.
“Hech bir shaxs hujjatiz qolmaydi” huquqiy aksiyasi doirasida tuman markazidan 100 km uzoqlikda joylashgan “Chambil” MFY Avjin qishlog‘iga borganimizda Safar Xurramov va uning turmush o‘rtog‘i Malohat Normatovalar 35 yildan buyon shar’iy nikoh asosida yashab kelayotgani ma’lum bo‘ldi. Ularning murojaati asosida shar’iy nikohi qonuniy qayd etilib, er-xotinga nikoh guvohnomasi berildi, — deydi bo‘lim mudirasi.
Mas’ulning qo‘shimcha qilishicha, Safar aka va Malohat opa 35 yillik shar’iy nikohdagi turmushi davomida 7 nafar farzand, 14 nabira va 1 nafar evarali bo‘lgan.
100 km yo‘lni bosib o‘tish uchun to‘rt soatlab yurgan, bizdek insonlar taqdiriga befarq bo‘lmagan tuman FHDY bo‘limi mudirasi Ozoda opaga, u kishi orqali Adliya vazirligi va viloyat Adliya boshqarmasi xodimlariga minnatdorlik izhor qilaman. Shunday odil siyosat olib borayotgan yurtboshimizga sog‘liq tilaymiz, — deydi oila boshlig‘i Safar aka.
Izoh (0)