Қашқадарё вилоятининг Деҳқонобод туманида 35 йилдан бери шаръий никоҳ асосида яшаб келган эр-хотин никоҳи расмийлаштирилди. Бу ҳақда “Дарё”га Деҳқонобод туман ФҲДЁ бўлими мудираси Озода Ашурова хабар берди.
Билдирилишича, туман ФҲДЁ бўлими ҳамда Давлат хизматлари маркази ходимлари чекка ҳудудларга бориб, узоқ йиллар давомида шаръий никоҳда бўлган, айрим муаммолар сабаб никоҳи расмий рўйхатга олинмаган фуқаролар муаммосини ўрганган.
“Ҳеч бир шахс ҳужжатиз қолмайди” ҳуқуқий акцияси доирасида туман марказидан 100 км узоқликда жойлашган “Чамбил” МФЙ Авжин қишлоғига борганимизда Сафар Хуррамов ва унинг турмуш ўртоғи Малоҳат Норматовалар 35 йилдан буён шаръий никоҳ асосида яшаб келаётгани маълум бўлди. Уларнинг мурожаати асосида шаръий никоҳи қонуний қайд этилиб, эр-хотинга никоҳ гувоҳномаси берилди, — дейди бўлим мудираси.
Масъулнинг қўшимча қилишича, Сафар ака ва Малоҳат опа 35 йиллик шаръий никоҳдаги турмуши давомида 7 нафар фарзанд, 14 набира ва 1 нафар эварали бўлган.
100 км йўлни босиб ўтиш учун тўрт соатлаб юрган, биздек инсонлар тақдирига бефарқ бўлмаган туман ФҲДЁ бўлими мудираси Озода опага, у киши орқали Адлия вазирлиги ва вилоят Адлия бошқармаси ходимларига миннатдорлик изҳор қиламан. Шундай одил сиёсат олиб бораётган юртбошимизга соғлиқ тилаймиз, — дейди оила бошлиғи Сафар ака.
Изоҳ (0)