“O‘zbekiston — 2030” strategiyasini 2024-yilda amalga oshirishga qaratilgan davlat dasturi to‘g‘risidagi prezident farmoniga ko‘ra, 1-martdan “Har bir mahalladan ikki nafar dasturchi” dasturi joriy etiladi.
Hujjatga muvofiq, “yoshlar daftari” jamg‘armasi mablag‘larini yoshlarni chet tillari va kasb-hunarga o‘qitish maqsadlariga yo‘naltirish amaliyoti yo‘lga qo‘yiladi.
Shuningdek, yoshlarni zamonaviy kasblarga o‘qitish bo‘yicha “Ustoz” maxsus platformasi ishga tushiriladi va dastlabki bosqichda mazkur platforma orqali 250 ming nafar yoshlar qamrab olinishi ta’minlanadi.
Yosh xotin-qizlarni tadbirkorlik, marketing, grafik-dizayn kabi zamonaviy kasblarga o‘rgatish uchun “Qizlar akademiyasi” platformasi ishga tushiriladi va bu orqali yosh xotin-qizlar uchun turli tanlov, loyihalar, o‘quv oromgohlari, stajirovkalar tashkil etiladi.
Farmonning mazkur bandi to‘liq, sifatli va so‘zsiz bajarilishi uchun masʼul etib Kambag‘allikni qisqartirish va bandlik vazirligi, Oila va xotin-qizlar qo‘mitasi va Yoshlar ishlari agentligi belgilangan.
Eslatib o‘tamiz, 2023-yil dekabrida Oila va xotin-qizlar qo‘mitasining bo‘ysunuvi Vazirlar Mahkamasiga o‘tkazilgandi.
Izoh (0)