Rossiya davlat dumasining axborot siyosati qo‘mitasi raisi o‘rinbosari Anton Gorelkin rossiyaliklarni G‘arb davlatlari bilan urush boshlangan taqdirda iPhone’lar o‘chishi haqida ogohlantirdi.
Gorelkinning so‘zlariga ko‘ra, agar harbiy mojaro boshqa bosqichga o‘tsa, Apple barcha iPhone’larni, Google esa barcha Android smartfonlarini o‘chirib qo‘yishi mumkin.
Agar harbiy mojaro butunlay boshqa bosqichga o‘tsa stavkalar ham ko‘tariladi. Men ba’zi ekspertlar Uchinchi Jahon urushi deb ataydigan narsa haqida gapiryapman. O‘shanda Apple Rossiyadagi barcha iPhone’larni, Google esa Android telefonlarini o‘chirib qo‘yishi aniq, — dedi deputat.
Bir kun avval Vladimir Putin G‘arbni Rossiya va AQSH boshchiligidagi NATO harbiy ittifoqi o‘rtasidagi to‘g‘ridan to‘g‘ri mojaro Uchinchi Jahon urushiga bir qadam qolganini bildirishidan ogohlantirgan edi.
O‘tgan oy Fransiya prezidenti Emmanuel Makron kelajakda Ukrainaga quruqlikdagi qo‘shinlarni yuborishni istisno qilmasligini ma’lum qilgan. Makronning so‘zlariga javoban Putin zamonaviy dunyoda hamma narsa bo‘lishi mumkinligini aytgan. Prezidentning qo‘shimcha qilishicha, Ukrainada allaqachon NATO qo‘shinlari mavjud, uning so‘zlariga ko‘ra, Ukraina jang maydonida ingliz va fransuz tillarida so‘zlashuvchi harbiylar mavjud.
Izoh (0)