Kelajakda mintaqada amalga oshishi mumkin bo‘lgan logistik koridorning taqdiri qaysi mamlakatning energetika resurslarini qay darajada eksport va import qilish salohiyatiga bog‘liq. Bu haqda O‘zbekiston Respublikasi Prezidenti huzuridagi Strategik islohotlar agentligi direktorining birinchi o‘rinbosari Abdulla Abduqodirov “Daryo” bilan suhbatda aytib o‘tdi.
Abduqodirovning taʼkidlashicha, hozirda Fors ko‘rfazidagi mamlakatlarning asosiy maqsadi uglevodorod resurslarini Xitoy, Hindiston va global Yevropaga sotish.
“Bu yerda faqat uglevodorod resurslarini emas, balki elektr energiyani sotish ham juda katta ahamiyatga ega. Chunki 70-yillarda Yevropa komissiyasi tomonidan CASA-1000 loyihasi ishlab chiqilgan. Shu loyiha Transafg‘on temiryo‘li loyihasi yuzaga kelishiga sabab bo‘lgan. Bu loyihada O‘rta Osiyo mamlakatlaridagi ortiqcha elektr energiyani Afg‘onistonga va Pokiston orqali Hindistonga eksport qilish ko‘zlangan edi”, — deydi Abdulla Abduqodirov.
Tahlilchining qo‘shimcha qilishicha, bugungi kunda bu loyiha ustida ishlanmoqda va shuning uchun ham Rossiya O‘zbekistonning gaz omborlariga qiziqish bildirmoqda.
“Hozir bu loyiha ustida ishlanmoqda. Agar shu loyihaga qiziqish bo‘lib, energiya resurslarini Rossiya yoki Qozog‘istondan eksport qilish aniq bo‘lsa, CASA-1000 loyihasini amalga oshirish istiqboli kengayadi. Aynan shuning uchun Rossiya bugungi kunda o‘z gazini ko‘proq O‘zbekistonga sotish va O‘zbekistondagi gaz omborlarini sotib olishga qiziqmoqda. Ular O‘zbekistonni o‘ziga xos bir xab qilmoqchi. Bu yerda gaz orqali elektr energiya ishlab chiqarib, ishlab chiqarilgan elektr energiyani Pokiston, Hindiston va boshqa mamlakatlarga sotish mumkin. Ularning qiziqishi ham shunda. Xuddi shu narsa Qatar, Saudiya Arabistoni va Eron uchun ham qiziq.
Bundan tashqari, Turkmaniston kelajakda Xitoyga gaz eksportini oshira olmasligini tushunib yetdi. Shu boisdan Turkmaniston ‘Lojuvard’ koridori orqali gaz eksportini Yevropaga yo‘naltirmoqchi”, — dedi Abduqodirov.
Maʼlumot o‘rnida, O‘zbekistondagi eng yirik “Gazli” yerosti gaz omboriga egalik qiluvchi Gazli Gas Storage qo‘shma korxonasi taʼsischisi o‘zgargani haqida xabarlar tarqalgan edi. Gazli Gas Storage kompaniyaning mavhum ishtirokchilari haqidagi OAVda tarqalgan xabarlarni asossiz deb atagandi.
Izoh (0)