Келажакда минтақада амалга ошиши мумкин бўлган логистик коридорнинг тақдири қайси мамлакатнинг энергетика ресурсларини қай даражада экспорт ва импорт қилиш салоҳиятига боғлиқ. Бу ҳақда Ўзбекистон Республикаси Президенти ҳузуридаги Стратегик ислоҳотлар агентлиги директорининг биринчи ўринбосари Абдулла Абдуқодиров “Дарё” билан суҳбатда айтиб ўтди.
Абдуқодировнинг таъкидлашича, ҳозирда Форс кўрфазидаги мамлакатларнинг асосий мақсади углеводород ресурсларини Хитой, Ҳиндистон ва глобал Европага сотиш.
“Бу ерда фақат углеводород ресурсларини эмас, балки электр энергияни сотиш ҳам жуда катта аҳамиятга эга. Чунки 70 йилларда Европа комиссияси томонидан CASА-1000 лойиҳаси ишлаб чиқилган. Шу лойиҳа Трансафғон темирйўли лойиҳаси юзага келишига сабаб бўлган. Бу лойиҳада Ўрта Осиё мамлакатларидаги ортиқча электр энергияни Афғонистонга ва Покистон орқали Ҳиндистонга экспорт қилиш кўзланган эди”, — дейди Абдулла Абдуқодиров.
Таҳлилчининг қўшимча қилишича, бугунги кунда бу лойиҳа устида ишланмоқда ва шунинг учун ҳам Россия Ўзбекистоннинг газ омборларига қизиқиш билдирмоқда.
“Ҳозир бу лойиҳа устида ишланмоқда. Агар шу лойиҳага қизиқиш бўлиб, энергия ресурсларини Россия ёки Қозоғистондан экспорт қилиш аниқ бўлса, CASА-1000 лойиҳасини амалга ошириш истиқболи кенгаяди. Айнан шунинг учун Россия бугунги кунда ўз газини кўпроқ Ўзбекистонга сотиш ва Ўзбекистондаги газ омборларини сотиб олишга қизиқмоқда. Улар Ўзбекистонни ўзига хос бир хаб қилмоқчи. Бу ерда газ орқали электр энергия ишлаб чиқариб, ишлаб чиқарилган электр энергияни Покистон, Ҳиндистон ва бошқа мамлакатларга сотиш мумкин. Уларнинг қизиқиши ҳам шунда. Худди шу нарса Қатар, Саудия Арабистони ва Эрон учун ҳам қизиқ.
Бундан ташқари, Туркманистон келажакда Хитойга газ экспортини ошира олмаслигини тушуниб етди. Шу боисдан Туркманистон ‘Ложувард’ коридори орқали газ экспортини Европага йўналтирмоқчи”, — деди Абдуқодиров.
Маълумот ўрнида, Ўзбекистондаги энг йирик “Газли” ерости газ омборига эгалик қилувчи Gazli Gas Storage қўшма корхонаси таъсисчиси ўзгаргани ҳақида хабарлар тарқалган эди. Gazli Gas Storage компаниянинг мавҳум иштирокчилари ҳақидаги ОАВда тарқалган хабарларни асоссиз деб атаганди.
Изоҳ (0)