Toshkent shahri Sergeli tumanida tabiiy gazdan noqonuniy foydalangan issiqxona aniqlandi, deb xabar beradi Bosh prokuratura huzuridagi departament.
Qayd etilishicha, departamentning Sergeli tuman bo‘limi tomonidan GTF xodimlari bilan hamkorlikda tergovga qadar tekshiruv o‘tkazilgan. Tekshiruvda fuqaro J.K. va boshqalar “Bobur” MFY hududidagi uyda tijorat maqsadida tashkil etilgan issiqxonada temir truba va rezina shlanglar yordamida umumiy foydalanishdagi tabiiy gaz tarmog‘iga o‘zboshimchalik bilan ulanib, jami 320,4 ming metr kub tabiiy gazni o‘g‘irlab, davlat va jamiyat manfaatlariga 480,7 million so‘m zarar yetkazgani aniqlangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkentda gazdan noqonuniy foydalangan ikkita issiqxona davlatga 934 mln so‘m zarar yetkazgani to‘g‘risida xabar berilgandi. Shuningdek, Bo‘stonliqda 241 mln so‘mlik elektr energiyasidan noqonuniy foydalangan dalahovlilar aniqlangan edi.
Izoh (0)