Surxondaryo viloyati Oltinsoy tumanida yo‘l-transport hodisasini sodir etib, fuqaroning o‘limiga sabab bo‘lgan sobiq profilaktika inspektoriga hukm o‘qildi. Bu haqda Oliy sud matbuot kotibi Aziz Obidov xabar berdi.
Qayd etilishicha, 2023-yil 12-dekabr kuni soat 18:15 larda Sho‘rchi tumani “Joyilma” mahallasida profilaktika inspektori bo‘lib ishlovchi shaxs hamkasbiga tegishli Cobalt’ni boshqarib ketayotib, “Baxshitepa-1” mahallasi hududida velosiped yetaklab ko‘chani kesib o‘tayotgan fuqaroni urib yuborgan.
Oqibatda fuqaro og‘ir tan jarohatlari olgan va ko‘rsatilgan tibbiy muolajalarga qaramay shifoxonada vafot etgan.
Jinoyat ishlari bo‘yicha Oltinsoy tuman sudi hukmiga ko‘ra, sobiq profilaktika inspektori Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan aybdor deb topilgan. Unga 1 yil 6 oy muddatga transport vositalarini boshqarish huquqidan mahrum etgan holda 2 yil muddatga ozodlikdan mahrum qilish jazosi tayinlangan.
Avvalroq Surxondaryo viloyatining Denov tumanida yo‘l-patrul xizmati xodimi piyodani urib yuborgani to‘g‘risida xabar berilgandi. Piyoda bosh miya chayqalishi tashxisi bilan Denov tumani markaziy shifoxonasiga yotqizilgan.
Izoh (0)