Сурхондарё вилояти Олтинсой туманида йўл-транспорт ҳодисасини содир этиб, фуқаронинг ўлимига сабаб бўлган собиқ профилактика инспекторига ҳукм ўқилди. Бу ҳақда Олий суд матбуот котиби Азиз Обидов хабар берди.
Қайд этилишича, 2023 йил 12 декабрь куни соат 18:15 ларда Шўрчи тумани “Жойилма” маҳалласида профилактика инспектори бўлиб ишловчи шахс ҳамкасбига тегишли Cobalt’ни бошқариб кетаётиб, “Бахшитепа-1” маҳалласи ҳудудида велосипед етаклаб кўчани кесиб ўтаётган фуқарони уриб юборган.
Оқибатда фуқаро оғир тан жароҳатлари олган ва кўрсатилган тиббий муолажаларга қарамай шифохонада вафот этган.
Жиноят ишлари бўйича Олтинсой туман суди ҳукмига кўра, собиқ профилактика инспектори Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан айбдор деб топилган. Унга 1 йил 6 ой муддатга транспорт воситаларини бошқариш ҳуқуқидан маҳрум этган ҳолда 2 йил муддатга озодликдан маҳрум қилиш жазоси тайинланган.
Аввалроқ Сурхондарё вилоятининг Денов туманида йўл-патрул хизмати ходими пиёдани уриб юборгани тўғрисида хабар берилганди. Пиёда бош мия чайқалиши ташхиси билан Денов тумани марказий шифохонасига ётқизилган.
Изоҳ (0)